Klokka 14.42 fekk politiet melding om eit barn som var sakna under vatn i samband med bading i Movatnet i Norheimsund. Etter kort tid vart barnet funne medvitslaust, ifølgje politiet.
Politiet og andre naudetatar var i gang med livreddande førstehjelp klokka 14.56.
15.14 var lege frå luftambulansen framme på staden.
Ein halv time seinare jobba helsepersonell framleis med hjarte- og lungeredning.
Klokka 16.15 tysdag stadfesta politiet at barnet er ein gut og at tilstanden hans er kritisk. Luftambulanse hadde då teke av for å frakta guten til Haukeland universitetssjukehus.
Plutseleg sporlaust borte
Ulukkesstaden er ein kjend badeplass ved Movatnet, som ligg like ved kommunesenteret Norheimsund. Guten var på badestranda saman med mora og søskena.
– Plutseleg var eitt av barna sporlaust borte, seier operasjonsleiar Tatjana Knappen i Vest politidistrikt til NRK.
Eit vitne kom forbi og ringde politiets naudnummer. Politiet sende straks ressursar til staden.
– Det gjekk ikkje så lang tid før det vart funne eit barn under vatn. Barnet vart henta opp og det vart utført livreddande førstehjelp omgåande. Det har gått føre seg i lengre tid, seier operasjonsleiaren.
Guten er fem år
Klokka 17.15 opplyser konstituert politistasjonssjef i Kvam, Ann-May Garen, til NRK at barnet er fem år.
Ho kjenner kjenner ikkje helsetilstanden hans per no.
– Men eg håpar det skal gå bra med barnet, i og med at me ikkje har høyrd noko meir, seier Garen.
Familien blir varetatt av politiet og kriseteamet i Kvam herad.
