Illsinte turistar aksjonerte i Flåm

Sogn Avis skriv tysdag om den spesielle episoden:

Det var søndag reisefylgjet kom til Flåm. Dei hadde tinga billettar til denne fjordturen eitt år i førevegen, og temperaturen steig fort då dei ikkje fekk sleppe ombord i ferja «Fjærlandsfjord» fordi det var fullt av andre passasjerar.

Oppheta diskusjon

Då stilte asiatane seg opp på ferjelemmen slik at denne ikkje kunne hevast, skriv Sogn Avis. Det utvikla seg til ein oppheta diskusjon mellom turistane og ferjemannskapet. Først etter ein time innsåg asiatane at slaget var tapt, og ferja kunne legge ut på turen sin.

(Artikkelen held fram under biletet).

– Tragisk

Ordførar Noralv Distad har i ein e-post til Fjord1 gitt uttrykk for kor uheldig han meiner slikt er.

• LES OGSÅ: Mot sesongrekord for Flåmsbana
• LES OGSÅ: Milliontap på turistferje

Fjord1 legg seg flat

Fjord1 forklarar episoden i Flåm med svikt i førebuingane. Kommersiell direktør Hallgeir Kleppe seier til avisa at han forstår frustrasjonen til dei asiatiske turistane.

– Vi beklagar og legg oss flate for dei som hadde bestilt billettar og ikkje kom med. Slik skal det ikkje vere.

Han seier dei hadde fått bestilling på 105 personar, men i det fine vêret kom det langt fleire, og då vart dei tekne på senga. Mange utan førehandstinga billett strøymde ombord.

– Vi greidde ikkje skilje mellom dei som hadde tinga turen på førehand og dei andre som ville ha seg ein tur.

Det høyrer med til historia at det asiatiske reisefylgjet fekk fjordturen sin dagen etter.