I Ytre Arna, om lag 40 kilometer i luftline frå episenteret til jordskjelvet vest for Øygarden, kjende Reidar Aasheim og kona Kari på naturkreftene i dag.
– Det var ei veldig rumling i djupet under huset. Eg trudde det var ein kraftig salve i steinknuseverket her i nærleiken, seier Aasheim.
Men då han ringde dit, fekk han vite at det ikkje hadde vore sprenging der i dag. I staden var det eitt av dei sterkaste jordskjelva i Norge på mange år som vibrerte gjennom bakken.
Eit jordskjelv med styrke 3,8 tilsvarer ein eksplosjon med 7559 kilo TNT, ifølgje seismolog Dominik Lang i forskningsinstituttet Norsar.
- LES MEIR:
Var redd for huset
– Huset byrja å rista ganske bra. Lampar og slikt skrangla som berre det, seier Aasheim.
– Kona stod på kjøkkenet. Ho tenkte at «no fer det ned, alt saman», seier han.
Etter nokre sekund var det over. Huset står.
– Redd var eg ikkje, men er ikkje interessert i å ha det slik fleire gonger, seier Aasheim.
Kjende det i beina
Mange hordalendingar og sogningar har kjend skjelvet i dag.
Linn Borlaug Grønning, som jobbar ved Linn Bad i Vik, var ein av dei.
– Eg sat her og jobba. Brått kjende eg at stolen min rista. Det skjedde to gonger. Eg kjende det skikkeleg i beina. Då eg gjekk ut i gangen, kom alle kollegaene mine òg ut. Vi hadde alle merka den same ristinga, fortel Grønningen.
NRK-lesarar har meld at dei kjende skjelvet på Landås, i Austrheim, i Florø, vest på Sotra, Fjøsanger, Dalekvam, Granvin og Askøy, mellom andre stader.
– Eg merka det her på Voss òg. Det rumla i huset, nok til at eg såg på klokka og merka meg tida, skriv Sølvi Mortensen på Facebook.
– Var det jordskjelv her i Hordaland (Rosendal) no? Syns heile huset rista, skreiv Signe Instanes til NRK klokka 09:52 på 03030.no.
– Det var skikkeleg ekkelt. Først var det eitt smell, og så eitt smell til. Heile blokka rista, seier Richard Sørensen, busett på Ågotnes i Fjell kommune.