Evakueringa starta klokka 14:00.
– Eg kan bekrefte at det er hol i skutesida på båten, seier Sølve Oldeide i Nordfjord hamn.
Dykkarar har inspisert skadane på skroget og brannmannskap jobbar no med å pumpe ut vatn frå eit lukka skott. Inne i skipet er det skadde området stengt av.
Ekspedisjonsskipet «Fridtjof Nansen» var på veg frå Lofoten til Flåm i Sogn då det grunnstøytte.
Skipet kom seg til kai for eiga maskin med assistanse frå redningsskøyta.
Ingen av dei 398 om bord skal ha kome til skade i hendinga.
Neste stoppestad for dei vert Ålesund ifølge kommunedirektør i Kinn, Terje Heggheim.
– Heldigvis ser det ut som dette har gått veldig bra, men som kommune vil vi vere i beredskap og er engstelege for at slikt kan skje, seier ordførar i Kinn, Ola Teigen.
Vindkast på 70 knop i området
– Det er ingen rapporterte skader og stemninga skal vere god om bord.
Det fortel pressevakt Øystein Knoph i Hurtigruten Expeditions.
Han fortel at skipet grunnstøytte klokka 03:17 i natt og fekk skader. Det var dårleg vêr med vindkast på 70 knop i området.
Om bord er det 233 gjestar i tillegg til ei besetning på 165 personar.
Vil ikkje spekulere i årsak
Uavhengig av sterk vind og vêr i området vil ikkje Hovudredningssentralen trekke slutningar.
– Eg vil ikkje spekulere i årsak, seier Oddgeir Andersen ved Hovudredningssentralen.
Naudetatane er på staden og arbeider for å få oversikt over situasjonen.
– Dei har meldt om skader på skroget, men at dei ligg stabilt der, seier operasjonsleiar Tom Johannessen ved Vest Politidistrikt.