Denne vinteren har vore svært travel for dei som driv med bilberging. Førde bilberging har på det meste hatt 52 oppdrag på ein dag. Ved Viking i Lærdal har dei berga åtte vogntog ein vinterdag.
- Sjå videoen øvst på sida: Slik bergar dei eit vogntog i grøfta (Video: Bjarne Eldevik)
- LES OGSÅ:
Ei av årsakene til den auka arbeidsmengda for bilbergingsselskapa er vinteren vi har. Den starta tidleg, og det har vore mykje snø mange stader. Dermed har mange bilar hamna i grøfta eller køyrd seg fast.
Må dra vogntogae opp fjellet
I januar hadde sjåfør Anders Frydenlund ved Viking Lærdal omlag 60 oppdrag som gjaldt store køyretøy. Han køyrer for Vang Autoservice og dekkjer Hemsdalsfjellet og Hol-Aurland til fylkesgrensa, og har også oppdrag på Filefjell.
– Det er både norske og utanlandske vogntog, men det er nok eit fleirtal av dei utanlandske.
Dei fleste oppdraga har gått på å dra bilar opp fjellet og å dra opp dei som har hamna i grøfta.
- LES OGSÅ:
- LES OGSÅ:
Prisen på eit oppdrag varierer frå 5000 til 50 000 kroner.
– Det går sjølvsagt på kva som har skjedd, kor langt vi må køyre og kor mange timar som trengst. Det er dyrt å berge eit vogntog som har velta, seier han.
Flest utanlandske
Georg Piel i Viking redningsteneste på Stårheim seier at dei i løpet av vinteren har hatt 30-40 oppdrag med å hjelpe vogntog. Og dei fleste er utanlandske.
– Vi har hatt mykje køyring i år. Det går mest i å få vogntoga opp bakkane og enkelte treng hjelp til å komme seg opp av grøfta.
På det meste har dei hatt fem-seks oppdrag på ein dag.
Tener godt med pengar
Dagleg leiar i Førde bilberging, Arild Tistel, seier at dei ikkje kan klage på denne vinteren. Med over 50 oppdrag på ein dag, tener dei godt med pengar.
– Vi kan ikkje klage, butikken går bra når det er slik vinter. Men vi jobbar jo veldig mykje, til alle tider på døgnet.
Frå november til i dag har dei hatt 67 utrykkingar til store køyretøy, der 34 har vore fastkøyringar eller utforkøyringar.
- LES OGSÅ:
- LES OGSÅ:
- LES OGSÅ:
40 prosent auke
I desember var det 40 prosent auke i forhold til same månaden året før. Tistel tippar på at januar har hatt ein auke på omlag 30 prosent.
– Dei to siste vintrane har jo vore veldig forskjellige. I fjor kom den ikkje før etter nyttår, medan dei kom allereie i oktober denne sesongen.
– Vi må vere beinharde
Felles for dei selskapa NRK har snakka med, er at dei ikkje slepp avgarde vogntoga før dei har fått bankgaranti for utlegga.
– Vi må vere beinharde, ellers har vi det gåande. Dermed får vi betalt, sjølv om det kan ta tid før vi har pengane våre.
Også Georg Piel på Stårheim seier dei er nøydde å vere strenge, og dette er Arild Tistel samd i.
– Dei utanlandske selskapa burde vore pålagde å ha forsikringsordninga, slik dei norske har, slik at redninga var dekka. Vi får pengane til slutt, men det går lang tid og vi må ofte vente lenge på skadestaden før vi har bankgarantien, seier Tistel i Førde bilberging.