Redningssselskapet får ti millionar meir

I det salderte statsbudsjettet ligg det inne ti ekstra millionar til Redningsselskapet, noko som er godt nytt for ein organisasjon som langt frå var nøgde med årets løyvingar i statsbudsjettet.

Då statsbudsjettet vart lagt fram i oktober, fekk selskapet 30 millionar kroner mindre enn dei hadde bedd om, og Igland Malkenes var klar på at dette ville bety at båtar måtte setjast på land.

Eit stykke fram til dagens beredskap

– Vi er letta fordi det ser ut til at det byrjar å gå opp for dei ansvarlege myndigheitene kva slags verksemd vi driv med. Du kan ikkje kimse av tryggleiken for det norske folk på sjøen.

Det seier sals- og marknadsansvarleg i Redningsselskapet i Sogn og Fjordane, Martin Igland Malkenes.

Men han presiserer at han langt ifrå er nøgd med situasjonen.

– Det er gledeleg at regjering og storting innser kva rolle vi spelar for det norske samfunn. Men det er framleis eit stykke fram for at vi skal klare å oppretthalde den beredskapen som vi har, seier Igland Malkenes.

• LES OGSÅ: Vart berga av redningsskøyte som risikerer å bli sett på land
• LES OGSÅ: Redningsselskapet ba om 70 millionar - fekk 44 til beredskap

Fryktar konsekvensane

Redningsselskapet bad om 70 millionar, og ender til slutt med 54 millionar kroner. Kva konsekvensane blir, er førebels uvisst.

– I Sogn og Fjordane er Stad såpass viktig for skipsfarten at det nok alltid vil bli prioritert. Men vi har også to mindre skøyter i Solund og Gulen, samt ei som er i Måløy som vi ikkje veit kva vil skje med i framtida, seier Igland Malkenes.

Når ein kan vente ei avklaring på framtida for desse skøytene, torer ikkje Igland Malkenes å svare på.

– Det er slikt som dei bestemmer sentralt, seier Igland Malkenes.

– Vi er letta fordi det ser ut til at det byrjar å gå opp for dei ansvarlege myndigheitene kva slags verksemd vi driv med. Du kan ikkje kimse av tryggleiken for det norske folk på sjøen, seier Igland Malkenes.