Fleire tilsette i Fellesforbundet i Sogn og Fjordane har skulda den valde leiaren for mobbing og trakassering. Jarle Kirketeig som har gått ut i media med saka, har fått sparken.
- LES OGSÅ:
No kastar forbundsstyret seg inn i saka. Jorge Dahl er blant dei som krev at leiar i Fellesforbundet, Arve Bakke, orienterer styret.
– Dette er ei belastning for Fellesforbundet på heile Vestlandet. Difor må forbundsstyret få ei orientering og vi må få høve til å diskutere kva som eventuelt kan gjerast frå forbundet si side, seier Dahl til NRK.no.
– Slik kan vi ikkje ha det
Mobbesaka i Fellesforbundet i Sogn og Fjordane har teke ei ny vending etter at det mektige Forbundsstyret no får saka i fanget på førstkomande møte den 5. oktober.
Forbundsstyremedlemmene vil ikkje lenger sitje passive og sjå på at Jarle Kirketeig må slutte i stillinga si som organisasjonsarbeidar i Fellesforbundet i Sogn og Fjordane.
Det går ikkje an at den som varslar om mobbing sjølv blir oppsagt, meiner Rolf Geir Hillestad, som også er Forbundsstyremedlem.
– Jarle Kirketeig kjenner seg trakassert, prøver å ordne opp, men får så sparken. Det er heilt grufullt og burde på ingen måte skje i fagrørsla, seier Hillestad.
- LES OGSÅ:
- LES OGSÅ:
Lever i ei berg- og dalbane
Kirketeig er den tredje i rekkja som har skulda den valde leiaren i Sogn og Fjordane for alvorleg mobbing og trakassering.
Etter at Kirketeig gjekk ut i media om saka, har Fellesforbundet i fylket svart med å gje han sparken. Kirketeig sjølv er svært glad for at Forbundsstyret no engasjerer seg i saka.
– Eg er takksam for at dei vil ta det opp og at dei ser problemet. Det er godt at forbundet ser at vi ikkje kan ha det slik i fagrørsla, seier Kirketeig.
Han har lenge gått sjukmeld som følgje av påkjenninga av saka.
– Eg lever i ei berg- og dalbane, men den støtta eg har fått betyr utruleg mykje, seier Kirketeig som fortel at både medlemmar og andre folk utanfrå har teke kontakt.
- LES OGSÅ:
- LES OGSÅ:
(Artikkelen held fram under TV-saka)
Vil ikkje kommentere saka
Leiar i Fellesforbundet, Arve Bakke, har konsekvent nekta å uttale seg om saka. Heller ikkje etter at det no er klart at saka kjem opp i Forbundsstyret, vil Bakke stille opp til intervju.
Han viser i staden til informasjonssjef Vidar Grønli som mellom anna har følgjande kommentar.
– Arve Bakke vil ikkje kommentere saka i media, men han vil orientere forbundsstyret, seier Grønli som poengterer at dei ønskjer at saka blir løyst.
Ingen fylkesleiinga i Fellesforbundet vil kommentere saka. Heller ikkje fylkesleiinga sin advokat vil uttale seg.
- LES OGSÅ:
– Ei alvorleg sak
Eit anna medlem i Forbundsstyret, Arne Hagen, stiller seg undrande til at ingen frå fylkesleiinga vil uttale seg, i det han karakteriserer som ei alvorleg sak for Fellesforbundet.
– At konflikten var så sterk var eg ikkje klar over før eg sette meg skikkeleg inn i den i dag. Ei kvar sak som gjeld mobbing og trakassering må ryddast opp i, og det burde vore gjort før den gjekk så langt som den har gjort i dette tilfellet, seier Hagen.
- LES OGSÅ:
Kan krevje ekstraordinært årsmøte
Ifølgje Fellesforbundet sine vedtekter kan Forbundsstyret gripe inn og krevje ekstraordinært årsmøte i lokallag. Vi må vurdere nøye om vi skal krevje nettopp dette, fortel Jorge Dahl.
– Det må vere vanskeleg å vere medlem i ei avdeling der du ikkje veit kva som går føre seg og les forferdeleg historier i media, seier Dahl.
Landsmøtet i Fellesforbundet startar i Oslo den 7. oktober, og Hillestad ser ikkje vekke frå at mobbesaka vil bli tema der.
– Dersom ikkje saka er løyst kan det vere på sin plass med ein debatt om korleis vi skal handtere slike saker, seier Hillestad.