– Dette er veldig bra, allereie etter tre veker i regjering leverer Høgre og Framstegspartiet på vegar, seier fylkesleiar Frank Willy Djuvik i Frp til NRK.no.
Den borgarlege regjeringa legg i dag fram sine tillegg til statsbudsjettet for neste år.
Der er det klart at dei vil satse meir på veg, for heile landet er det snakk om å auka løyvingane til riks- og fylkesvegar med 1,8 milliardar kroner.
- LES OGSÅ:
Får 20 mill. meir – kan låne 139 mill.
I Sogn og Fjordane er både fylkesleiar i Frp, Frank Willy Djuvik og stortingsrepresentant for Høgre, Bjørn Lødemel godt nøgde.
Den nye regjeringa gir 20 millionar kroner i direkte auke til fylkesvegar i Sogn og Fjordane, noko som kjem på toppen av dei 36 millionar kroner dei raudgrøne la på til opprusting og fornying av fylkesvegnettet i 2014.
I tillegg kjem rentekompensasjon på investeringar tilsvarande 139 millionar kroner på fylkesvegnettet. Dette er pengar fylkeskommunen må låne, men der dei slepp å betale renter.
- LES OGSÅ:
- LES OGSÅ:
Trur Olden-Innvik er sikra
Djuvik gler seg over at den totale investeringsramma for fylkesvegar i Sogn og Fjordane aukar med 195 millionar kroner frå i år til 2014.
– For Sogn og Fjordane sin del så kjem vi i ein heilt ny situasjon. Vi trudde vi ikkje hadde investeringsmidlar til fylkesvegar i komande fireårsperiode, men no blir det ein diskusjon på kva vi faktisk kan bruke pengane til, seier han og held fram:
– Vi har moglegheit til å realisere fleire både store og små prosjekt i fylket.
Korleis og kor pengane skal brukast skal fylkespolitikarane bestemme når dei samlast på fylkestinget i desember, men Djuvik nemner fleire prosjekt han meiner dei vil einast om.
– Alle dei politiske signala tyder på at Olden-Innvik står først i køen av prosjekt politikarane vil prioritere. Eg ser no for meg at vi har funne finansiering av det prosjektet, og at vi samtidig har moglegheit til å starte å realisere både Kystvegen og andre mindre prosjekt, som til dømes gang- og sykkelvegar.
Stortingsrepresentant for Arbeidarpartiet, Ingrid Heggø, legg ikkje skjul på at ho gler seg over at det blir meir pengar til ved. Men ho vil vente med å seie noko meir om løyvingane til ho har sett det samla biletet når regjeringa legg fram budsjettet klokka 10.