Bak plankar som skulle verne runene mot vêr og vind har skrifta vore skjult i over 60 år. På svalgangen ved inngangen til Urnes stavkyrkje i Sogn kunne folk igjen få sjå den snirklete, gamle skrifta.
– Det er runer frå 1200-talet, meinte ekspertane som var her i går, seier Marit Bøen.
Ei bøn for Brynjulf
RUNER: På det lengste går skrifta nesten ein meter nedover stavane på svalgangen til stavkyrkja.
Foto: Rune Fossum / NRKFor første gong sidan ho starta å jobbe i Urnes stavkyrkje i 1979 har ho fått sjå runene med eigne auger. Det er takka vere to tyske forskarar frå Kiel som samlar inn diktstrofar på norrønt som dei skal gi ut i ei samling.
– Eg har lest om runer i boka til Magnus Olsen om dei yngre norske runene, og eg har funne alle dei runeskriftene som er inne i kyrkja, men desse har vore skjulte, seier Bøen.
«Halde den heilage herre hand over Brynjulfs and, det vere sant», står det på eine sida av ein av svalgangsstavane.
– Det er vel ei bøn om at Gud må halde si hand over Brynjulf. Kanskje det var ein som budde her? undrar Bøen.
STOR INTERESSE: Forskar Edith Marold (til venstre) frå Universitetet i Kiel tek runene nærare i augesyn. Ho er prosjektleiaren bak den planlagde samlinga av diktstrofar på norrønt. Marit Bøen (til høgre) tykkjer det er spennande å få sjå runene etter å ha jobba i stavkyrkja i over 30 år.
Foto: Rune Fossum / NRKSnart usynlege igjen
Dei tyske forskarane måtte søke Riksantikvaren om løyve til å ta vekk kassen rundt runene.
– Det var veldig bra at dei fatta interesse. Eg synest det var så kjekt å få den eposten, for då tenkte eg at eg også kunne få sjå, seier Bøen og gliser frå øyre til øyre.
Og ho er ikkje den einaste som er interessert i å sjå på den gamle skrifta. Snart blir den truleg igjen skjult.
– Men vi håpar jo at vi kunne få til ei tildekking som er gjennomsiktig, så folk kan sjå det. For du ser jo kor spennande folk synest det er.