I fjor måtte ho ha ufrivillig påskeferie – i år er gjestene tilbake på turisthytta

– Det vil bli heilt fullt. God gamaldags påskestemning – og som vi gler oss, fortel vert Solbjørg Kvålshaugen ved DNT-hytta Fondsbu i Jotunheimen.

I koronapåska 2020 kunne dei ikkje ta imot bestillingar, men heldt ope for oversjøiske gjester som ikkje kom seg heim.

– Påska 2021 var vi stengt grunna koronasjukdom i staben. Eg hadde min fyrste påskeferie på 25 år, fortel ho.

Påska for to år sidan var alle hytter i landet stengt. I fjor måtte dei betente turisthyttene på ny halde stengt grunna koronapandemien, mens DNT hadde eit tilbod ved ubetente og sjølvbetente hytter.

I år går det mot ei normal påske i fjellheimen. Det gler generalsekretær i Den Norske Turistforening (DNT), Dag Terje Klarp Solvang

– No kan dei betente hyttene våre ta imot påskegjester igjen for første gong sidan 2019, og gjett om vertskapa er klare og gler seg.

Tøffe år for reiselivet

Sjølv om det no er enklare å reise etter pandemien, ser mange ut til å bli innanlands i påskeferien også i år.

I ei undersøking NHO Reiseliv har fått utført svarer 85 prosent av dei spurte at dei skal ha påskeferien i Noreg.

Det er det høgste talet som er målt sidan organisasjonen starta undersøkinga i 2014.

Også handelsorganisasjonen Virke har spurt nordmenn kva dei skal i påska 2022. Her svarar fire av ti har planar om å ta påskeferie i år, og meir enn halvparten av desse på hytte i Noreg.

Merkar stort trykk

Undersøkinga frå NHO Reiseliv viser også at 7 prosent av oss har planar om å bu på hotell. Det er det høgste målte talet sidan undersøkinga starta i 2014.

Ved Hotel Alexandra i Loen seier hotellsjef Richard Grov at dei er tilbake i ein normalsituasjon.

– Dei to føregåande påskene har ikkje vore noko særleg å skryte av. I påska i år ser det til ut at vi har stort trykk, og vi har mange bestillingar, seier han.

Etter to påsker der pandemien i stor grad har hindra nordmenn i feriere, er reiselivsnæringa no letta over at nordmenn vil på påskeferie:

– Det betyr enormt mykje. Mange har slite hardt økonomisk og nærast vore fråteke store delar av marknaden. Det seier kommunikasjonssjef Merete Habberstad i NHO Reiseliv.

– Vi har mange fridagar. Mange vil bruke dei på skiopplevingar, på hytta eller nær andre destinasjonar. Og i år er jo alle desse gjenopna, seier Habberstad.

Lurt å sjekke kva som er ledig

Tilbake i fjellheimen er enkelte raske med å bestille overnatting på dei påskeopne hyttene, medan andre nok ventar litt, fortel Dag Terje Klarp Solvang i DNT.

Det betyr at nokre hytter alt har mange bestillingar, mens det i andre framleis er god plass.

– Så her er det berre å sjekke kva som er ledig og kaste seg rundt for å planlegge, seier generalsekretæren i DNT.

På turisthytta Fondsbu i Jotunheimen kjem det mange stamgjester, både par, familiar og einslege – og folk i alle aldrar.

– Men det er alltid plass for umelde gjester, fortel turistvert Solbjørg Kvålshaugen.