Ellevill konkurranse i Sogndal

For unnarennet var verken snødekt eller bratt, men blautt og flatt: Sognefjorden.

Ti lag kjempa om heider og ære under Fjellsportfestivalen sin Fjellsportchallenge i Sogndal sentrum i dag.

Lovens lange arm

– Det blir for det fyrste veldig kaldt. Me hadde ein diskusjon for ei veke sidan om at det kanskje kunne bli fjordbading, so eg har nok grua meg litt, ja.

Han var politiet sitt lag, Lovens lange arm, sin representant i dagens våtaste øving: fjordhopping.

– Ein må berre trø til når det gjeld, sjølv om eg ikkje har so veldig lyst uti vatnet no, seier politibetjenten.

– Saltoen til han som hoppa no blir vanskeleg å følgja opp, men eg får prøva å finna på noko lurt noko. Dette er ein ganske annleis dag på jobb enn det som er vanleg!

(Artikkelen held fram under biletet)

• LES OGSÅ: Sporty politi utfordrar ordføraren

Kreativ innsamling

Konkurransen var delt inn i fire disiplinar, der det byrja med bruskassestabling framfor Sogningen storsenter. Etter det var det klart for snørekøyring etter hest med innlagde hopp i sentrumsparken i Sogndal.

• LES OGSÅ: Mange ungdomar vel laussnøen - men ikkje alle gjer det trygt

Tredje øving var fjordhoppinga, medan den fjerde øvinga gjekk ut på å samla inn mest mogleg pengar til eit godt føremål i lokal eller regional regi.

Og ordførar Jarle Aarvoll, som deltok på kommunen sitt lag, fann ein kreativ måte å samla inn pengar på.

– Ein heldig person får fri bruk av ordføraren i ein time. Det kan vera støvsuging, bilvask eller nesten kva som helst. Sjølvsagt innanfor nokre moralske grenser, då, smilte ordføraren.

• LES OGSÅ: Vann fotokonkurranse med storm-bilete

Det vart samla inn over 18000 kroner total.

Boble

– Eg er strålande nøgd. Både publikum og dei frivillige var i kjempehumør, og alt gjekk heilt supert, strålte arrangør Anna Sara Fjeld.

Vinnaren får ei boble, og kven det heldige laget er, blir presentert på Fjellsportkvelden i kveld.

• LES OGSÅ: Bratt moro for Tyyl!-gutane