På E16 er Bogetunnelen mellom Bergen og Voss framleis stengt. Geolog kjem på staden når det lysnar, og vil vurdere om det er trygt å opne for trafikk då.
Omkøyring går via fylkesveg 7.
Statens vegvesen melde i går kveld at vegen måtte stengast på grunn av rasfare.
– Det har regna kraftig i dag. I lia over tunnelen går det ein bekk som har tatt med seg stein og grus som har hamna i vegbana, fortel trafikkoperatør Tina Fjeldavli ved Vegtrafikksentralen
Geolog er tilkalla
Vegvesenet tar dermed ingen sjansar og stenger den ras- og ulukkesutsette europavegen.
– Vi har tilkalla geolog. Vi veit ikkje når han er framme, men geologen er avhengig av dagslys for å sjå skikkeleg.
Anbefalt omkøyring er fylkesveg 7 om Norheimsund. Statens vegvesen vil ha folk ute for å dirigera trafikken ved Trengereid og Voss.
Fjeldavli ber folk ta det roleg på omkøyringsvegen
– Det er skiftande føre på fylkesveg 7, spesielt over Kvamskogen. Der er det vekslande is- og snøføre, åtvarar ho.
Riksveg 13 stengt i Odda
Også i Odda er det fare for ras. Riksveg 13 ved Lona er som følgje av dette stengt. Ny vurdering blir gjort klokka 08.00 måndag morgon.