Dommen mot to menn frå Sunnfjord er no klar. Dei må begge sone to år i fengsel for kidnappinga som skjedde i slutten av oktober i fjor.
Hovudmannen i saka, ein 25 år gamal mann med langt rulleblad, blei også dømd for eit anna tilfelle av grov vald – og for å ha rana den andre gjerningsmannen.
Saka har vekt stor merksemd i bygdebyen Førde, der alvorleg kriminalitet høyrer til sjeldenheitene.
Då saka var oppe for retten forklarte i alt 23 vitne seg. Fleire av dei fortalde om eit lukka miljø prega av vald, truslar og rus.
- Les også:
Har slite etter hendinga
Sogn og Fjordane tingrett finn ingen nåde i det dei to mennene forklarte i retten. Retten meiner at dei begge er skuldige.
«Retten er etter bevisførsel ikke i tvil om at fornærmede befant seg på stedet mot sin vilje og at han som følge av volden var forhindret i å komme seg bort.»
Retten finn det bevist at mannen som blei kidnappa følte sterk dødsangst og at det ikkje er tvil om at han blei utsett for svært grove valdshandlingar:
«Retten legger videre vekt på at fornærmede har forklart at han opplevde hendelsen som svært skremmende. Han forklarte i retten at han var livredd og at han trodde at han kom til å dø. Fornærmede har i etterkant av hendelsen har hatt mareritt, slitt med dårlig søvn og har vært redd for å gå alene i Førde.»
Ankar straffutmålinga
Hovudmannen sin forsvarar, Frode Sulland, seier at klienten hans er skuffa over at han blei dømd for eit tilfelle av vald og eitt tilfelle av ran – som ikkje har noko med kidnappingssaka å gjere.
– Vi vil også anke på bakgrunn av straffutmålinga for dei ulike tiltalepostane, seie Sulland til NRK.
Aktor i saka, politiadvokat Kristine Bu, har ikkje vore tilgjengeleg for kommentar.