Med siger over Dale vil Tornado Måløy avgjere krinsmeistertittelen i 3. divisjon fotball for menn. Men eit Dale-lag i poengnaud, har ingen planer om å la seg overkøyre i Måløy.
- LES OGSÅ:
- Både for vår del, og for spenninga i 3. divisjon, så håper eg vi tek poeng. Det hadde vore kjekt å halde spenninga heilt inn, seier Dale-trenar Stian Neset.
Kan avgjerast i dag
Etter at Florø delte poenga med Stryn fredag kveld, har stryningane allereie gratulert Tornado Måløy med seriemeisterskapen. Tornado Måløy leiar divisjonen med fire poeng på Stryn. Medan Stryn har to kampar att av sesongen, har serieleiaren tre - medrekna dagens oppgjer mot Dale.
- SJÅ:
Sjølv tek Tornado Måløy situasjonen med knusande ro.
- Vi skal halde steamen oppe og sikre oss dette med stil, seier trenar Kent Rune Bugjerde.
Poenga viktigast
- Det viktigaste for oss er likevel å få med oss poeng. Eg er likegyldig til kven som vinn, så lenge vi klarer den sjetteplassen som sikrar oss 3. divisjonsspel også neste år, seier Neset og minner om at Dale har vore bra med på notane i dei siste bortekampane mot serieleiaren.
- Vi har hatt dei i kne to gonger der oppe. Sist vart det 4-4. Gongen før der leia vi 1-0 til det var att 30 minutt, men tapte til slutt 1-7, seier Dale-trenaren.
Skal ryste Måløy
Dale står med tre strake tap i divisjonen og reiser til Måløy utan fleire spelarar. Mellom andre suspenderte Idar Haugen Rochlenge, Kees Erstad og Eirik Systadal.
- Alle dårlege trendar er til for å snuast. Vi skal opp med haka og ryste eit måløypublikum som hausar opp sine eigne. Eg ventar vi møter eit urutinert Tornado Måløy-lag med skuldrene godt over øyra. Klarer vi å stresse dei, så skal vi plukke med oss poeng, seier Neset.