Bur midt i sin eigen juletreskog

Bonden på Vie i Førde har hatt nokre travle dagar i det siste. På tunet står juletrea sirleg på rekke, her er det noko for ein kvar smak.

Med julaftan like rundt hjørnet er det mange som er innom for å gjere unna den siste førebuinga før jul, nemleg sikre seg det finaste treet.

– Eg har mange fast kundar, så det må bety at dei er nøgde når dei kjem att, år etter år, seier han då NRK er på besøk laurdag ettermiddag.

Det finst eit tre for alle sin smak

Eit grønt glitrande juletre er for mange ein svært viktig del av jula. Nokon likar dei litt tjukke, andre smale, medan nokon skal ha ein viss avstand mellom greiene. Uansett om du vil ha det kort eller langt, så finst det eit juletre for deg.

Sjur Wie har drive aktiv med juletreproduksjon sidan 1979, og på dei over 30 åra har han fått erfare at alle slags tre kan falle i smak.

– Folk er forskjellige, og heldigvis for det, ler han.

• LES OGSÅ: Fleire bør satse på å dyrke juletre
• LES OGSÅ: Slik vart flaggstanga eit juletre

(Artikkelen held fram under biletet)

– Det ferskaste treet i byen

Rundt huset sitt på Vie er det juletre på alle kantar. Nokre er planta i år, medan andre er blitt 7–8 år og er klare for å bli pynta heime hos med og deg.

Ein del av trea er allereie hogge ned, medan andre står i ein stemningsfull juletreskog. Her kan folk plukke seg ut akkurat det treet dei har mest lyst på.

– Det er jo den perfekte utstillinga. Og så treng ikkje folk spør kor tid det er hogge, det er det ferskaste treet i byen, seier Wie til NRK.no.

Fann det perfekte treet

Ei av dei som er har funne seg det perfekte juletreet er Anne Kristin Kleiven.

– Vi lurte litt på å hogge sjølv, men det gav vi opp, seier ho og viser glad fram treet som oppfylte krava.

– Det er veldig viktig at det er jamt og fint og at ein kan henge pynten slik at det blir litt ordentleg, ler ho.

– No er det berre å kome seg heim og få på kulene og glitteret og alt.

(Artikkelen held fram under biletet)

Gler seg over glade kundar

For Sjur Wie er det tradisjonsrike juletresalet ein viktig del av den totale innteninga som bonde. Han driv framleis som bonde på heiltid, og dei par hundre juletrea han sel kvar desember kjem godt med.

– Det er ein del av totalproduksjonen som gjer til at eg kan vere heiltidsbonde, seier han.

Men mest av alt er det koseleg å drive med juletre. Det har naturleg nok mykje å gjere med at kundane som kjem innom er så blide som det går an.

– Det er triveleg. Folk er i veldig godt humør, så eg synest dette er ein koseleg produksjon, seier Wie.

• LES OGSÅ: Slik blei dei kvitt juletrea sine

Skal behandlast som avskorne blomster

Og med 30 års erfaring veit han litt om korleis ein skal ta best mogleg vare på juletreet som no er på veg inn i dei tusen heimar.

– No kan ein ta det rett inn i hus. Viss det er litt lang stamme, skjær av to, tre, fire centimeter med ei sag og sett det i vatn så det får trekkje til seg litt vatn.

– Når ein så skal setje det på fot i morgon eller noko, så skal ein skjære av nesten like mykje. Ein skal behandle treet nesten som avskorne blomster, forklarar han.

Ifølgje Wie skulle folk ideelt sett ha hogge juletreet sist helg, for då var det plussgrader og temperaturskilnaden hadde ikkje blitt like stor.

• LES OGSÅ: Kritiske til populære plastjuletre
• LES OGSÅ: Tusenvis av småkryp inn i stova

Lovar at treet skal halde til neste år

Sjølv om det i dag låg rundt 0 grader på garden på Vie blir det likevel rundt 20 grader i temperaturskilnad når trea blir tekne inn.

– Det blir brutalt uansett, seier han men lovar at trea skal halde på nålene til over nyttår.

– Om det skulle byrje drysse får folk berre kome inn att og byte treet, det er ingen problem, seier bonden med eit smil.