Brødrene Aa vil etablere nytt selskap og starte opp igjen drifta

Hjørnesteinsbedrifta i Hyen har inngått ei intensjonsavtale med finske Summa Defence om å etablere eit nytt selskap.

Saman vil dei starte opp igjen drifta i slutten av september og gradvis hente inn att tidlegare tilsette.

Dei vil då fullføre prosjekta som var i gang ved verftet og skape ny verksemd.

Brødrene Aa har vore ei hjørnesteinsbedrift i Hyen i Gloppen kommune, som designar og bygger hurtigbåtar i karbonfiber.

I april sende verftet permitteringsvarsel til 170 tilsette, då tre kontraktar med Norled om bygging av nye hurtigbåtar vart kansellerte.

Tre veker seinare, i slutten av mai i år, slo dei seg konkurs.

Vil hente tilbake tidlegare tilsette

Det blir gode moglegheiter for tidlegare tilsette å kome tilbake i jobb på verftet utover hausten, ifølge tidlegare styreleiar Gustav Johan Nydal.

Men kor mange som kan kome tilbake er foreløpig uvisst.

– Vi kjem til å trappe opp igjen aktiviteten gradvis.

I første omgang vil selskapet konsentrere seg om å bygge ferdig dei båtprosjekta dei var i gang med før konkursen.

– Det står att no å få på plass avtaler med kundane på desse båtane. Det er det vi kjem til å jobbe med no fram mot oppstart i september, seier Nydal.

Tillitsvald i selskapet, Jon Vidar Storsletten, håpar at selskapet no tek tilbake alle som har lyst å jobbe der.

– No har vi gått og surra rundt i heile sommar. Dei fleste er vel klare for å begynne i jobb igjen.

– Vi hadde ikkje noko val

Situasjonen etter oppbodet av Brødrene Aa har vore trist og ubehageleg, seier tidlegare dagleg leiar i selskapet, Tor Øyvin Aa.

– Men vi hadde ikkje noko val, sann som situasjonen blei.

I juli sette selskapet i gang ny drift i Eikefjorden.

Men verken Nydal eller Aa var nokon gong i tvil om at dei skulle starte opp igjen for fullt. Spørsmålet var berre når og med kva for ein investor.

– Eg har vore sikker på at vi skulle få i gang drifta igjen heile tida. Men det har vore viktig å få ein så god base som mogleg før vi starta opp att, seier Aa.

Planen er å halde fram med båtproduksjon slik dei har gjort tidlegare.

– Vi har eit spesielt byggemateriale. Det er ein av grunnane til at Summa Defence er veldig interessert i det vi held på med. Og å kunne bruke det i andre produkt enn vi brukar det i dag. Men deira ønske er at vi skal halde fram med båtproduksjon.

Etablerer nytt selskap med finsk investor

– Summa Defence vil med dei andre verfta sine tilføre både kapital og kompetanse i den nye drifta og styrkje kapasiteten ved verftet i Hyen.

Det seier Nydal, representant for Brødrene Aa Eiendom, i ei pressemelding tysdag ettermiddag.

Det finske forsvars- og tryggingsteknologikonsernet Summa Defence eig frå før to verft i Finland.

Konsernsjef Jussi Holopainen ser store moglegheiter ved å tre inn med majoritetane av aksjane i det nye selskapet.

– Dette vil stryke posisjonen vår i skipsbyggingsmarknaden og auke potensialet for skipsbygging til forsvaret, seier konsernsjefen.

Design- og ingeniørselskapet Paradis Nautica er òg ein del av oppkjøpet, noko som vil bidra til å styrke Summa-konsernet sine design- og utviklingsressursar ytterlegare, skriv dei i pressemeldinga.