Åtvarar om snøskredfare i fjellet

Den siste veka har det kome fleire centimeter med snø over store delar av landet. Onsdag melder varsom.no om moderat farevarsel i fleire fjellområde.

Noregs vassdrags- og energidirektorat (NVE) følg med på skredfaren i fjella, og har observatørar som sjekkar snødekket dagleg ved behov.

– Eg vil oppfordra dei aller fleste til å halde seg vekke frå snøskredterreng på torsdag, seier snøskredvarslar Jostein Aasen i NVE.

Snøskredterreng er snødekka terreng som er brattare enn 30 grader.

Turgåar Olav Sægrov fortel at han sjekkar farevarsla før han går på tur i fjella. Ein gong då han var yngre fekk han sjå korleis eit skred blei utløyst.

Han tenker seg ikkje ut på torsdag, men planlegg ein tur på fredag.

– Då skal eg ikkje gå i skredterreng.

Nysnø og vind

Torsdag kjem det inn ein del vind frå nord. Skredvarslar Aasen forklarar at den kalde og lette snøen vil blåse innover og danne hard og fersk foggsnø i sørvende terreng.

– Foggsnøen er ustabil og vil legge seg på eit snøterreng som ikkje toler så mykje, og då aukar skredfaren.

Områda med oransje snøskredvarsel torsdag er:

• Salten
• Trollheimen
• Romsdal
• Sunnmøre
• Indre Fjordane
• Indre Sogn
• Voss
• Hardanger

– All grunn til å vere på vakt

Skal du bevege den i skredterreng, oppfordrar Aasen deg til å sjekke snøskredvarsel og vindstyrken i området.

– Enten hald deg unna snøskredterreng, eller gå i laussnø for det er den det er best å gå på ski i uansett.

Er du på ein stad kor vinden ikkje får tak og lagar hard flaksnø, bør det vere greitt å gå tur.

– Høyrer du drønnelydar frå snøen eller ser at snøen sprekk opp under beina dine, er det all grunn til å vere på vakt, men er snøen laus og fin er det mindre risiko for lagdeling som kan utløyse snøskred.

Flest ulykker på ski

Fråvær av fareteikn som drønnelydar og sprekkar betyr likevel ikkje at det er trygt.

Det krev god kunnskap for å kjenne igjen svake lag i snødekket.

Sidan 2008 har 91 personar døydd i snøskred. Dei fleste ulykkene skjer medan folk brukar ski.

Snøskred kor menneske har døydd eller blitt teke av skred er registrert i perioden november til juni, men fleirtalet av snøskredulykkene skjer i mars.

Fire personar har døydd og til saman 48 personar har blitt teke av snøskred i månaden desember frå vinteren 2011–2012 til no.

I sesongen 2020–2021 har 9 personar døydd i snøskredulykker.

– Går ein utanfor snøskredterreng, er ein alltid heilt trygg uavhengig av snøskredfare. Skal du i skredterreng, må du gjere ei vurdering av snødekket, seier skredvarslar Aasen.

Du kan sjekke snøskredfaren og lære meir om snøskred på varsom.no.