Årdal: Startar nye søk klokka 10

– Vi startar søket no i eit område i Utladalen ved Vetti, som vi ikkje fekk søkt gjennom laurdag, seier innsatsleiar Helge Øvstetun.

Leitinga har til no i hovudsak vore konsentrert om eit turområdet, der den sakna pleidde å gå turar.

Vanskeleg område

40 personar frå Sivilforsvaret i Årdal og Aurland, Norsk Folkehjelp, Røde Kors og Norske Redningshundar søkte laurdag gjennom Utladalen, Moadalen, og området der han bur.

– Det er eit svært krevjande område å leite i, med stadvis tett vegetasjon, steinmurar og bratte fjellsider, seier Øvstetun.

• Les også: Har avslutta søk for kvelden i Årdal

Det vart og gjort finsøk langs elva Utla. Patruljer søkte også i terrenget opp mot Vetti og Avdalen.

Etter at søket vart avslutta laurdag kveld, har det vore lyttepostar ute i terrenget gjennom natta.

– Dei har ikkje gjort nokon observasjonar, seier Trond Hatlenes, som er operasjonsleiar ved Sogn og Fjordane politidistrikt.

Få spor

Den sakna 24-åringen frå Eritrea forsvann torsdag frå bustaden sin på Årdal Mottakssenter. Etter det har ein få sikre observasjonar av den sakna.

• Les også: – Vi er veldige urolege for kva som kan ha skjedd

Klokka 12 torsdag skal han ha blitt observert då han kom med buss frå Årdalstangen. Seinare er det gjort to observasjonar av det som kan vere den sakna, ein ved Naturhuset på Skåri i Utladalen, og ein observasjon på Vetti seinare på ettermiddagen.

• Les også: Politiet ber publikum sjå etter sakna

– Vi har ikkje fått i nye tips som gjer at vi førebels vil leite andre stader, seier Hatlenes.

Ny gjennomgang

– Vi skal no ha ein gjennomgang av leitinga så langt, og så får vi sjå korleis vi skal legge opp det vidare søket, seier Øvstetun.

Politiet oppmodar dei som har hus og hytter i området om å sjekke eigedomane sine.