I budsjettframlegget sitt går Senterpartiet inn for å løyve 21 millionar kroner til utbygging av Vik fengsel. Klinge meiner at dette vil vere langt meir fornuftig bruk av pengane enn å leige plassar i Nederland.
– Eg synest det er heilt håplaust, rett og slett, at vi brukar bortimot 300 millionar kroner på å leige fengselsplassar i Nederland når vi kunne ha brukt dei pengane på å utvide kapasiteten her til lands.
Ei utviding med 30 nye, lukka fengselsplassar ved Vik fengsel kostar medrekna kontorlokale mellom 40 og 45 millionar kroner. I alt fire parti på Stortinget har sett av pengar i framlegga sine til 2017-budsjett.
- Les også:
Men Jenny Klinge er skeptisk til om det let seg gjere å få fleirtal for løyvinga, sjølv om støttepartia til regjeringa, Kristeleg Folkeparti og Venstre, også i utgangspunktet er positive til utbygginga i Vik.
– Dessverre er stortingsfleirtalet heilt klare på at dei vil halde fram med å leige fengselsplassar i Nederland, framfor å bygge ut her i landet. Det synest vi i Senterpartiet er trist, for det er mogeleg å utvide fleire fengsel, mellom dei Vik fengsel.
Tidlegare har stortingsrepresentant Ingrid Heggø frå Arbeidarpartiet kome med den same kritikken mot leige av fengselsplassar som Klinge.
- Les også:
Men Marianne Vollan, som er direktør i Kriminalomsorgsdirektoratet, har tidlegare avvist i intervju med NRK at fengselsplassane i Nederland går utover kriminalomsorga i Norge.
– Desse fengselsplassane er jo finansierte for seg sjølv, så det har ingenting å seie for drift av fengsel i Norge.
Jenny Klinge seier det er påfallande at valutaendringar gjer leigeavtalen med Nederland 21 millionar kroner dyrare i 2017, akkurat den summen Senterpartiet vil løyve til Vik fengsel. I tillegg til kostnaden meiner ho det er mange uheldige sider ved å la norske fangar sone i utlandet.
– Det er vanskeleg for dei pårørande å kome på besøk, det er langt og dyrt å reise. Det er fleire som er sende med tvang, og det er heilt feil, meiner eg. Eit land som Norge bør kunne ta seg av sine eigne innsette.