– Fornuftig å trekkje forslaget
Sunnfjord-ordførar Jenny Følling (Sp) er ikkje imponert over måten byrådet i Bergen har gått fram på for å byte ut styreleiaren Jan Erik Kjerpeseth i Eviny med Øistein Andresen.
Forslaget var ikkje drøfta blant eigarkommunane før det vart kjent i BT måndag.
Sunnfjord kommune er ein av eigarkommunane i kraftselskapet. Følling vart kjent med forslaget gjennom media.
Saka skulle på generalforsamlinga i dag, men no har byrådet trekt forslaget, melder BT. Det meiner Sunnfjord-ordføraren var fornuftig.
– Det er heilt uhaldbart å føreslå styreleiar den dagen generalforsamlinga skal vere, seier Følling.
– Vi var på ingen måte budde til å gjere så dramatiske endringar gjennom nesten eit benkeforslag, så vi tykkjer det er ei god løysing at ein trekkjer framlegget og vi får ei valnemnd til å gå gjennom det slik at det blir eit greitt val å ta stilling til når vi skal ha ny generalforsamling, seier ho.