21 mister jobben hos 1881

Årsaka til kutta er at Opplysningen 1881 har mindre pågang. Ifølgje styret kostar det også minst å seie opp dei tilsette i Lærdal. Dei tilsette reagerte med sorg og sinne på oppseiingane.

Hovudtillitsvald og styremedlem Lilly Kvamme måtte bittert erkjenne at tilsetterepresentantane kom til kort i styret.

– Vi er svært skuffa. No skjedde akkurat det vi hadde frykta. Vi har hatt ein nedgang i trafikken, men vi er usamde i at dei skulle kutte alt på ei avdeling, seier Kvamme.

Skuffa og lei seg

Som tillitsvald deltok Kvamme på styremøtet i Oslo i dag.

Dei tre tilsetterepresentantane i Opplysningen 1881 stemde i mot kuttforslaget, men resten av styret hadde fleirtal og bestemte dermed at arbeidsplassane skal leggast ned.

• LES OGSÅ: I dag får 21 tilsette vite om dei framleis har jobb på 1881 i Lærdal
• LES OGSÅ: 1881 seier truleg opp 21 tilsette

Plasstillitsvalt Anne Elin Tunsberg for El- og IT-forbundet i Lærdal er svært skuffa over beskjeden som kom i ettermiddag.

– Det er veldig urettferdig at det er vi i Lærdal som må ta støyten, når dei brukar vikarar og midlertidige tilsette på dei andre sentralene. No blir vi 31 tilsette igjen, men vi veit ikkje kva som vil skje seinare, seier Tunsberg.

– Korleis vart dette tatt imot av dei tilsette?

– Det har vore stor spenning på sentralen i dag. No når vi har fått beskjeden vi frykta, er folk veldig lei seg. Det er ei veldig tung steming akkurat no.

• LES OGSÅ: Denne servicen slår du ikkje

Fryktar nedlegging av heile avdelinga

Ordførar i Lærdal, Arne Sanden (Ap), tok også beskjeden svært tungt.

– Dett er ein veldig trist dag for lærdalssamfunnet. Men det var ikkje overraskande. Dette er ein dag vi har venta på med skrekk og gru, seier Sanden.

Arbeidsplassane har betydd mykje for Lærdal. Ifølgje Sanden er det spesielt vanskeleg sidan dei fleste av arbeidsplassane hos Opplysningen 1881 i Lærdal er kvinnearbeidsplassar.

– Dei manuelle opplysningstenestene går stadig nedover, og vi fryktar at det neste steget vil vere ei nedlegging av heile avdelinga i Lærdal, seier Sanden.

• LES OGSÅ: 1 av 4 arbeidsplassar truga i Lærdal