Hopp til innhold

200 tunnelar har usikra PE-skum i taket: – Som bensin i fast form

Tunnelar over heile landet kan bli reine brannbomber ved ulukker eller motorhavari.

UTBREND: Hovdentunnelen i Høyanger hadde udekt PE-skum på veggar og tak. Slik såg det ut etter brannen i 1993. Alt var utbrent. Frå 1997 kom krav om at PE-skummet skulle dekketast til med sprøytebetong, men det gjaldt berre for nye tunnelar.

NRK

Dei gråe og svært brannfarlege mattene med PE-skum ligg klistra inn til tunnelveggen i Naustdalstunnelen på riksveg 5 i Sunnfjord.

– Skrekkscenarioet er at det skal skje ei trafikkulukke og at mattene tek fyr, seier Øivind Helle, beredskapsleiar for brann og redning i Sunnfjord kommune.

Saman med NRK er han på synfaring inne i den 6 kilometer lange tunnelen.

Beredskapssjef Øivind Helle i Sunnfjord kommune under synfaring av brannfarlege matter med PE-skum i Naustdalstunnelen.

Beredskapsleiar for brann og redning i Sunnfjord kommune, Øivind Helle, vedgår at dei har lite å stille opp dersom isolasjonsmattene med PE-skum tek fyr inne i Naustdalstunnelen. Mattene er synlege på tunnelveggen.

Foto: Bård Siem / NRK

Nokre av mattene er dekte til med eit tynt lag sprøytebetong. Andre er ikkje dekte til i det heile. 350 meter av tunnelen har brannfarlege matter på vegger og tak.

– Med brennande matter vil det bli ei veldig brannutvikling og kraftig røyk. Det vil bli vanskeleg eller ingenting å gjere for brannmannskapa, seier Helle.