Meir enn ein milliard menneske kan få sjå og høyre om solspegelopninga på Rjukan i dag. Allister Doyle frå pressebyrået Reuters seier at dette er noko spektakulært som interesserer heile verda. Sjølv er han britisk korrespondent for Reuters, og spent på solopninga. Over ein milliard menneske over heile verda kan lesa og sjå det me skriv, seier han.
Følg åpning her:
Men Doyle er ikkje aleine. Fleire store TV selskap er på Rjukan i dag. Brasil, Kina, CBS News frå USA, RTL frå Tyskland og Al Jazeera er på plass. Finsk tv har avtale med å få solreportasje frå TV2. Tyske RTL sender til 80 millionar menneske, brasiliansk tv-stasjon til 60 millionar, og kor mange i Kina og USA som kan sjå openberringa på Rjukan i dag, er det ingen som veit.
Presseansvarleg Kjell Gunnar Dahle og ordførar Steinar Bergsland i Tinn er litt svimeslegne av all interessa. Rådmann Rune Lødøen går rundt i pressesenteret og rister på hovudet og smiler mildt. Han har aldri sett maken. Og ut frå det me veit, har Telemark aldri sett lignande til interesse for ei enkelt hending.
Ein vill ide for hundre år sidan, blei til eit sprøtt prosjekt i 2007 då kunstnaren Martin Andersen fekk det for seg at det måtte vera mogleg å realisere ideen som Hydrogrunnleggjar Sam Eyde ikkje klara å få sett ut i livet.
Den sprøe ideen som dei fleste riste på hovudet av, skal altså avdekkjast i dag. Og kritikken har forstumma. Dette er moro, smila og latteren sit laust på Rjukan i dag.
Framleis er det overskya på Rjukan, men det er nok berre ein del av dramaturgien. Solstolane og solbrillene er på plass på Torvet, snart kjem SOLA. Tinn, Rjukan, Noreg og Verda er klare!