Det er Tokke kommunestyre som har vedtatt at alle tomter som er ti år eller eldre, skal prisast til null.
– Poenget med vedtaket er å skape interesse, seier teknisk sjef i kraftkommunen, Geir Roger Stange.
Ingen byggeboom
Dei aktuelle tomtene ligg spreidde rundt i heile kommunen. Folk kan velje mellom tomter i tre regulerte bustadfelt på Dalen, men og mellom tomter i Byrte, Høydalsmo, Lårdal og Åmdals Verk.
Men tilbodet har så langt ikkje skapt nokon byggeboom. Det er snart eitt år sidan sist det kom spørsmål om saka, seier Geir Roger Stange.
– Tyder det at det er null interesse for å busetje seg i Tokke?
– Tokke bør vere ein attraktiv kommune. Infrastrukturen er god, og vi brukar mykje ressursar for å gje barn og unge gode oppvekstvilkår. Men det kan jo vere eit spørsmål om arbeid. Men også der er det ei positiv utvikling i fleire nøkkelbedrifter i kommunesenteret, meiner Stange.
Skjerpar marknadsføringa
Stange trur at den manglande interessa det siste året kan forklarast med at kommunen har gjort ein for dårleg jobb på marknadssida.
– I dag må folk leite seg langt inn på heimesidene for å finne fram til tomtene. Heimesidene skal leggast om, og då reknar eg med gratistomtene får den plassen dei fortener, seier Geir Roger Stange.
I Høydalsmo kan du få gratis bustadtomt og naboskap til ein olympisk gullvinnar på kjøpet
Foto: Johs Apold / NRK
