– Eg synest jo at det er litt spesielt å forskjellsbehandle supporterar basert på kva farge dei har på trøya.
Sean Røskeland har vore ein trufast Brann-supporter i over 20 år. Kampen denne helga blir hans 31. i år.
Gleda var derfor stor då Sandefjord førre veke annonserte at kampen mellom dei blå og raude var gratis.
Men gleda var kortvarig.
Kan bli for dyrt
Nokre dagar etter annonseringa skjønte Røskeland at det var berre var supporterane til heimelaget som slapp å betale. Sjølv må han ut med 200 kroner for billetten.
– Eg synest jo det var veldig spesielt.
Han reknar det som forskjellsbehandling.
– Viss ein skal køyre ein sånn kampanje, så burde den gjelde for alle. Det er rett og slett umusikalsk av Sandefjord å ikkje likebehandle.
Han meiner også det er viktig å tenkje over dei økonomiske utfordringane som mange står i for tida.
– Dei tilreisande, som då gjerne reiser langvegsfrå har kanskje dyrare reisevegar, nokon flyg, nokon bussar og er 24 timar på reise. Det kan hende at det er nokon som ikkje har råd til 200 kroner.
Ingen dårleg samvit
Ideen om gratiskamp kom ettersom laget nærmar seg sesonginnspurt og treng all støtte dei kan få frå tribunen.
Det fortel sals- og marknadsleiar Erik Karlsen ved Sandefjord Fotballklubb.
– Næringslivet her lokalt ønskjer jo Sandefjord fotball alt godt og mest mogleg støtte frå tribunen. Difor er dei med på å støtte billettar til tilskodarane til laget vårt.
Klubben har heller ikkje dårleg samvit etter kritikken frå Brann-supporterane.
– I utgangspunktet er vi veldig fornøgde med måten vi har løyst det på og det er også støttespelarane våre, avsluttar han.
– Ein bør invitere alle til festen
Brann-supporteren har forståing for at det er lite klubben kan gjere med valet no. Likevel er han litt bitter.
– Viss ein skal lage ein festdag for alle som er glad i eliteserien i Norsk fotball, så bør ein invitere alle til festen, meiner han.
Hei!
Har du noen tanker om saken, eller tips til noe annet jeg bør se nærmere på? Send meg en e-post: Emilie.Lykke@nrk.no