Noregs einaste countrylinje: Neste stopp Nashville

– Det er heilt fantastisk.

Oliver Berntzen er korrekt kledd.

Med raudruta flanellskjorte og ein svartlakkert kassegitar av typen Yamaha hengande på hofta, herskar det liten tvil om at me har kome til rett klasserom på Seljord Folkehøgskule.

Her er det langt mellom pultane og kort mellom forsterkarar, pedalar, mikrofonstativ og høgtalarar.

Saman med klassekompisane William Coley Tveiten (bass), Markus Istad Lirhus (banjo) og lærar Kjetil Flatland (piano) er han i full gang med å øve når NRK stikk innom.

Saman utgjer dei Noregs einaste countrylinje.

Fyrste runde

Seljord har lange musikalske tradisjonar, men den unike countrylinja vart fyrst starta i 2023.

At nettopp denne sjangeren er hovudvekt på linja er ikkje tilfeldig.

Seljord er vertskap for Nordens største countryfestival kvar sommar, og blir gjesta kvart år av store nasjonale og internasjonale countryartistar.

Tett samarbeid med Countryfestivalen og profesjonelle aktørar i bransjen er ein del av opplegget.

Brenn for sjangeren

For bussjåføren Oliver Berntzen (21) frå Melhus er opphaldet i Seljord ein draum som går i oppfylling.

Han har drive med musikk i fleire år, og har ein eigen forkjærleik for country.

– Det varmar og gir meg ei eiga glede. Denne linja er perfekt for meg, fortel han.

Artistar som Johnny Cash og Willie Nelson står høgt i kurs.

– Eg likar den gjengen der.

– Er du den neste countrystjerna?

– Næh, det vil tida vise, seier Berntzen, som allereie kan skilte med fleire sjølvskrivne låtar, og har planlagt fleire konsertar med resten av gjengen.

Markus Istad Liehus trakterer banjo og gitar i gruppa. Han har fått mykje ut av dei fyrste månadane på folkehøgskulen i Seljord.

– Eg har vorte mykje betre til å spele framfor folk, og spele i band saman med andre, fortel han.

Dreg på langtur

Det er store ting på gang for den vesle musikalske banden.

Neste veke går turen til sjølvaste Nashville i USA, ein by mange ser på som ein slags hovudstad for country-sjangeren.

Her starta Dolly Parton karrieren for alvor.

Johnny Cash har sitt eige museum i byen.

Det same har den no 90 år gamle Willie Nelson, som på 60-talet skal ha vandra gatelangs på jakt etter eit plateselskap som ville signere den seinare verdskjende artisten.

Det er kort og godt her det skjer når ein snakkar om country, vil mange meine.

At gjengen frå Seljord skal vere med å ta del i moroa er stort, seier Berntzen.

I Nashville skal dei mellom anna jobbe med produsenten til countrystjerna Brad Paisley.

– Det betyr mykje for heile gjengen. Me skal kose oss, seier han.