Kunnskapsminister Torbjørn Røe Isaksen (H) seier Solberg-regjeringa vil vere strengare når det gjeld å godkjenne nye privatskolar enn Bondevik II-regjeringa.
Høgre og Frp vil innføre ei ny privatskolelov der det ikkje lenger blir stilt krav til at skolane skal utgjere eit religiøst eller pedagogisk alternativ.
– Men det blir ikkje noko frislipp. Vi legg opp til ein strengare praksis for godkjenning av nye friskolar enn det som var tilfellet under Bondevik II-regjeringa, seier Røe Isaksen til Aftenposten.
Han vil legge inn ei formulering om at private skoler skal få nei til å starte opp dersom etableringa vil ha negative konsekvensar for det lokale skoletilbodet.
Og det skal framleis vere ulovleg å ta utbytte frå private skoler.
Vil styrke lærarane
Kunnskapsminister Torbjørn Røe Isaksen meiner det aller viktigaste er å styrke lærarane i den offentlege skolen.
Han meiner det er ingen grunn til at ikkje Norge skal kunne ligge heilt i toppen av internasjonale skolerangeringar, og peikar på Finland som ligg i toppen av dei internasjonale rangeringane.
– Det er ingenting som tilseier at vi skal ha dårlegare føresetnader enn finnane. Vi må ha ambisjonar om å ha verdas beste skole og vere heilt i verdstoppen. Om vi klarer det i løpet av fire år, veit eg ikkje, seier han.