Arbeidarpartiet og Høgre sa måndag kveld nei til det planlagde giftdeponiet som har uroa mange i Brevik.
– Alle er glade her i dag, seier Jørn Vik som har tatt fram det norske flagget for å feire.
Det er jubel i Brevik. Folk meiner det enorme engasjementet blant innbyggarane har ført fram.
– Vi er veldig fornøgde for at det ikkje blir noko av, og at fornufta har sigra, seier Mette Ravlo.
Les også:
Føler eit stort press
Willy Sjøstrøm meiner Grenland nå endeleg kan bli kvitt inntrykket om den gule skya over Herøya.
– Nå kan vi fortelje at det er brukbart å bu her, og vi treng ikkje nokon giftpøl inn i gruvene her.
Trond Ingebretsen sit i utval for kommunalteknikk for Arbeidarpartiet og fortel om eit stort press og engasjement.
– Mange av oss bur i området og treffer folk heile tida, så vi merkar at det betyr mykje, seier Ingebretsen.
Les også:
Meiner politikarane er feige
Dalen Arbeiderforening og LO meiner all fakta må fram før politikarane seier ja eller nei til eit deponi. Han synest det er feigt at dei snur i spørsmålet om ei utgreiing.
– Det er heilt bak mål at politikarane ikkje vil vere med på ein demokratisk prosess med ei konsekvensutgreiing for å få alle fakta i saka, seier Tom Jacobsen som er hovudtillitsvald i Dalen Arbeiderforening.
Han er skuffa over Arbeidarpartiet si gruppe i Utval for Plan og Kommunal teknikk.
– Eg synest det i utgangspunktet er feigt. Men eg kan skjønne at Arbeidarpartiet ikkje vil stå åleine når dei andre samarbeidspartia er mot, seier Jacobsen.
Les også:
Vil mobilisere næringslivet
Irene Bordier Haukedal, distriktssekretær i LO Telemark, bur sjølv i Brevik og er klar på at ei konsekvensutgreiing trengst, uansett utfall.
– Eg meiner det er feigt å ikkje gjennomføre ei konsekvensutgreiing. Vi kan ikkje seie nei takk til mellom 70 og 100 nye arbeidsplassar utan å ha alle fakta på bordet, seier Haukedal.
Nå mobiliserer LO næringslivet for å få politikarane til å ta til fornuft, og håpar å kunne snu nokon før bystyremøtet i mars.
Les også: