Skrekkscener då tunnel på japansk motorveg kollapsa

Motorvegtunnelen kollapsa nær Koshu i Japan i natt norsk tid. Augevitne fortel om skrekkscener då enorme takkonstruksjonar ramla ned i vegbana.

Det er uklart kor mange bilar som var inne i den delen av Sasago-tunnelen på Chuo-motorvegen 80 kilometer vest for Tokyo, då taket byrja å kollapse.

Redningsarbeidarar fortalde søndag at dei hadde lokalisert fleire forkola menneske inn i tunnelen, men at det da var for farleg å hente dei ut.

Bilar tok fyr

Redningsarbeidet vart stansa i fleire timar, fordi det var stor fare for at fleire utrasingar frå taket.

Augevitne fortel om bilar som tok fyr då betongblokker frå taket raste ned i vegbana. Tjukk røyk frå minst to brennande bilar steig ut frå tunnelopninga, og begge desse vart trefte av betongen. Dei største elementa som fall ned var på 70 meter, opplyser brannvesenet.

Fortvilte menneske gjorde det dei kunne for å kome seg ut. Fleire titals greidde det ved å kome seg fram til naudutgangane, medan andre var innstengde i bilane sine.

Greidde å kome seg ut

Minst tre menneske er tekne til sjukehus, blant dei ei 28 år gammal kvinne som greidde å ta seg ut av tunnelen ved eiga hjelp. Ho har fortalt til redningsarbeidarar at ho ikkje veit korleis det har gått med fem andre som var saman med henne i bilen.

Familiefaren Tomohiro Suzuki (37) fortel om dramatikken då han, kona og dei to borna på seks og ni år kom seg ut av tunnelen. Først prøvde han å berge eit par personar som var fanga inne i ein brennande bil, men han måtte gi opp.

– Ein del av taket, like breitt som vegen, ramla rett ned på vegen framfor oss i ei v-form. Eg prøvde å ringje politiet for å fortelje at eg ikkje greidde å berge menneska som sat fast i bilane sine, seier han til Jiji Press.

Panikk i tunnelen

Suzuki fortel om panikk inne i tunnelen. Bilar snudde og prøvde å køyre mot køyreretninga for å kome seg ut. Han fortel at han fekk med seg kona og borna for å prøve å finne ein utgang.

– Eg var redd fordi eg først ikkje kunne sjå utgangen på grunn av røyken. Eg frykta at brannen skulle spreie seg slik at flammane nådde oss igjen. Vi let borna gå først ut av tunnelen, seier Tomohiro Suzuki.

Ein journalist i fjernsynsstasjonen NHK seier at han køyrde gjennom tunnelen då taket kollapsa.

– Eg greidde å kome meg ut, men fleire bilar like bak meg vart stansa av steinblokker og betongelement. Eg såg tjukk svart røyk bak meg, seier han.

– Ei forferdeleg oppleving

Ein mann i 30-åra, som var 50 meter frå der den største utrasinga skjedde, fortel om ei forferdeleg oppleving.

– Eit betongelement frå taket fall ned medan eg køyrde gjennom tunnelen. Eg såg at ein knust bil var i brann. Eg var livredd og kom meg straks ut av bilen. Det tok meg ein time til fots før eg var ute av tunnelen, seier han til NHK.

Den rundt fem kilometer lange Sasago-tunnelen, som går like ved Mount Fuji, er ein av dei lengste motorvegtunnelane i Japan.