Frankrike sin øvste diplomatiske utsending til Niger, ambassadør Sylvain Itté, er ein av dei som er innesperra i ambassadekomplekset.
– Dei får ikkje mat inn, og overlever på feltrasjonar, fortel Emmanuel Macron på eit pressetreff i Burgund.
31. august fekk den franske ambassadøren eit ultimatum om å forlate landet.
Militærjuntaen hevda at ambassadøren ikkje lenger hadde diplomatisk immunitet, og bad politiet kaste han ut av landet.
Frå Paris kom det grei beskjed om at kuppherrane ikkje hadde makt til å utvise ambassadør Itté.
Fredag skal han og andre utsende franske tenestepersonar ha blitt tatt til fange.
På spørsmål frå nyheitsbyrået AFP om Frankrike vurderer å hente heim ambassadøren som sit fanga svarer Macron:
– Eg gjer det vi er einige med president Bazoum om fordi det er han som har den legitime autoriteten i Niger, og eg snakkar med han kvar dag.
Blodig kupp
Den tidlegare franske kolonien har hatt alt anna enn ein fredfull sommar. Den demokratisk valte presidenten Mohamed Bazoum blei avsett 26. juli, og makta ligg no hjå militære offiserar.
Det blei det fjerde statskuppet sidan Niger blei eit sjølvstendig land i 1960, etter over tre tiår som koloni.
Franske styresmakter har nekta å anerkjenne militærjuntaen i Niger som landet sine leiarar.
Kuppmakarane kravde i august at den franske ambassadøren måtte forlate landet – eit krav Macron har nekta å innfri.
Militær inngriping
Etter kuppet meldte den vestafrikanske organisasjonen Ecowas at dei ville avsette kuppmakarane i Niger med militær makt. Planen fekk støtte frå Den afrikanske union, ein samarbeidsorganisasjon med 55 medlemsland.
Militærjuntaen har skulda den tidlegare kolonimakta for å ruste opp for eit militært angrep.
– Frankrike held fram å utplassere styrkane sine i fleire Ecowas-land som del av førebuingane til ein inngriping, forklarte regimets talsperson Amadou Abdramane på nasjonalt fjernsyn laurdag.
Frankrike har rundt 1500 soldatar stasjonert i Niger. Dei deltar i militæroperasjonar mot ytterleggåande islamistopprørarar i Vest-Afrika. Landet har også betydelege økonomiske interesser i Niger, og importerer store mengder uran derfrå.
Slapp fri franskmann
Torsdag blei ein annan mann som var halden som fange lauslaten. Stephane Jullien er rådgjevar for franskmenn i landet, og blei arrestert 8. september, skriv CNN.
Franske styresmakter bad om at han blei sett fri omgåande. Likevel sat han arrestert i ei snau veke før lauslating torsdag.
Det siste kuppet har blitt fordømd av omverda, mellom anna FN sin menneskerettssjef Volker Türk.
– Det må straks vendast tilbake til sivilt styresett og opnast rom der menneske kan delta, påverke og kritisere regjeringa sine handlingar og fråvær av handlingar, sa Türk.
Støtte frå naboland
I slutten av august tillét militærjuntaen i Niger at militærstyrkar frå Burkina Faso og Mali fekk kome inn i landet, skriv France 24. Det blei gjort «i tilfelle ei krigshandling» utanfrå, uttalte det nigerske utanriksdepartementet.
Òg i Niger sitt naboland mot vest, Burkina Faso, har det tilspissa seg mellom dei styrande og den tidlegare kolonimakta Frankrike.
Fredag kveld beordra militærjuntaen forsvarsattacheen ved den franske ambassaden til å forlate landet på grunn av «statsfiendtleg verksemd»
Utanriksdepartementet opplyser at diplomaten Emmanuel Pasquier og teamet hans har to veker på seg til å forlate landet, melder AFP.
– Påstanden om undergravande verksemd er openberrt fantasifull, seier ein talsperson for det franske utenriksdepartementet.