To redningsarbeidarar ber bort endå ein omkomnen i den hardt ramma Aceh-provinsen i Indonesia. (Foto: Reuters/Scanpix)
Talet på omkomne i Indonesia er no oppe i 107.000, opplyser det statlege senteret for koordinering av naudhjelp. Over 15.000 menneske er framleis sakna.
I Sri Lanka er 30.680 stadfesta omkomne, opplyser regjeringa. Nesten 5000 er framleis sakna, medan 580.000 er heimlause.
I India har talet på døde passert 10.000. I tillegg kjem 5700 menneske som er sakna, men som mest truleg er omkomne.
Talet på omkomne etter flodbølgja i Thailand har no passert 5300. Samstundes er talet på sakna nedjustert til 3500.
Over 200 menneske miste livet i andre asiatiske land rundt Det indiske hav, går det fram av offisielle tal. I Aust-Afrika omkom vel 300 menneske.
Trass i at det no er nesten to veker sidan flodbølgja, vart torsdag ein 70 år gammal mann funnen i live, fastklemd under ruinane av heimen sin i Aceh-provinsen i Indonesia.
Muhammad Zaini fortel at han vart klemd fast av ein vegg som rasa saman. Han fekk tak i vatn å drikke der han låg, og det berga truleg livet hans.