Nok ein gong driv ein redningsarbeid etter ei stor naturkatastrofe i Kina.
Tapet av menneskeliv aukar for kvart minutt i meldingane frå jordskjelv-områda i Sichuan-provinsen.
Jordskjelv
Gjennom historia har det vore mange store jordskjelv i Kina. Og, slike katastrofar plar råka det folkerike landet hardt.
Det største jordskjelvet, som kravde flest menneskeliv, var skjelvet i Shaanxi i 1556. Området ligg nord for Sichuan. Heile 830 000 menneskeliv gjekk tapt i denne hendinga.
Det elektroniske oppslagsverket Credo Reference har ei oversikt over dei største jordskjelva i verda gjennom tidene. Skjelvet i Shaanxi toppar denne lista.
Lista under er ei oversikt over dei største jordskjelva i Kina.
Det har vore fleire store jordskjelv i Kina i nyare tid. I 1976 omkom 242 000 menneske i eit skjelv i industribyen Thangastan.
Også skjelva i Gasnu (1920) og Xining (1927) kravde over 200 000 menneskeliv.
Flaum
Likevel er det flaum frå dei store elvane i Kina som har ført til dei største katastrofane i landet.
Då Huang He (Den gule elva) gjekk over sine breidder i 1931, mista om lag 2 millionar kineserar livet. I 1887 førte flaum i same elv til at over 1 million menneske døydde.
Også flaumar i den største elva, Chang Jiang (Den lange elva), har kravd sine menneskeliv gjennom historia. I 1911 omkom 100 000 menneske, i 1935 over 145 000 og i 1954 døydde 30 000 som følgje av flaum.
Syklonar
Syklonen i nabolandet Burma førre veke har vist korleis dei tropiske syklonane herja med sårbare samfunn i lågtliggjande område.
Syklonar kan også herja Kina, og i 1975 førte syklonen Nina til at over 230 000 menneske omkom.
