NRK Meny
Normal

Journalist drepen i Mogadishu

Væpna menn har skote og drepe ein kvinneleg radiojournalist i Mogadishu. Somalia er no på andreplass på lista over land i verda med flest journalist-drap.

Bombe i Mogadishu

Innbyggjarane i Somalia blir stadig offer for åtak. Journalistar er særleg utsette. I 2012 blei minst 18 journalistar og medietilsette drepne i Somalia - dobbelt så mange som det høgaste talet som tidlegare var registrert.

Foto: Mohamed Abdiwahab / Afp

Drapet på Rahmo Abdukardir skjedde søndag kveld, og er det siste i ei rekkje journalistdrap i krigsherja Somalia.

Den drepne kvinna jobba for den private radiostasjonen Radio Abduwaq og er den tredje journalisten som er drepen i Somalia hittil i pår.

– Veit ikkje kvifor

Det er kollegaer av kvinna og augevitne som fortel om drapet til nyheitsbyrået AFP.

– Ein av våre kvinnelege tilsette blei skoten og drepen i Mogadishu. Me veit ikkje kvifor ho vart drepen, og me er i sjokk, seier direktøren Abdikarin Ahmed.

Augevitna fortel at mennene nærma seg reporteren før dei losna fleire skot og sprang av garde.

– To menn væpna med pistolar skaut kvinna. Dei skaut mot henne fem gonger før dei flykta, seier vitnet Abdi Moalin Shire til AFP.

– Ho hadde følge av ei anna jente, men gjerningsmennene sikta ikkje på henne. Ho sprang vekk og ropa på hjelp, seier eit anna vitne, Issa Mohamed.

Utlovar dusør

I 2012 blei minst 18 journalistar og medietilsette drepne i Somalia. Det er dobbelt så mange som det høgaste talet som tidlegare var registrert.

Lovlause Somalia følgjer dermed hakk i hæl på verstingen, borgarkrigsherja Syria, når det gjeld drap på pressefolk.

Mistanken blir ofte retta mot al-Shabab-opprørarar tilknytta terrornettverket al Qaida når somaliske journalistar blir angripne.

Vald og lovløyse har prega Somalia etter at president Siad Barre blei styrta i 1991. I over 20 år var landet utan ei fungerande sentralmakt - regjering, politistyrke eller eit nasjonalt rettsvesen.

Etter ein lang prosess med støtte frå FN fekk Somalia endeleg på plass ein ny regjering i 2012.

Førre månad utlova den somaliske regjeringa ein dusør på 50.000 dollar til den som gav informasjon som resulterte i ei «vellukka domfelling av ein journalist-drapsmann».

Laster innhold, vennligst vent..
Laster innhold, vennligst vent..

SISTE NYTT

Siste nytt