Den såkalla kontaktgruppa for Ukraina skal førebu eit separat dokument kor dei skal plikta seg til våpenkvileavtalen som vart signert i september i fjor, seier kjelda til nyheitsbyrået Reuters.
Kontaktgruppa inkluderer russiske og ukrainske styresmakter i tillegg til Organisasjonen for tryggleik og samarbeid i Europa (OSSE).
Opplysinga er ikkje stadfesta av offisielle kjelder. Også tysdag blei det meldt at det var semje om våpenkvile, men det viste seg å ikkje vera riktig.
Framleis kampar i Aust-Ukraina
– Så langt er det for tidleg å snakka om ein våpenkvile, i alle fall med tanke på morgondagen, sa dei prorussiske separatistane sin forhandlingsleiar Denis Pusjilin i Minsk seint tysdag kveld.
Frankrike sin president François Hollande, Tyskland sin statsminister Angela Merkel, Ukraina sin president Petro Porosjenko og Russland sin president Vladimir Putin er onsdag i den kviterussiske hovudstaden Minsk for å meisla ut ein våpenkvile for Aust-Ukraina.
Samstundes held dei prorussiske opprørarane fram med sin bakkeoffensiv mot regjeringa sine styrkar i aust med full styrke.
Onsdag vart minst to personar drepne då ein granat trefte eit busstopp i byen Donetsk