Landbruksminister Israel Katz og viseminister i handels- og industridepartementet, Michael Ratson, kom i dag med sterk kritikk av statsministeren sin, og dei er redde for at Sharon har endra politikken sin overfor palestinarane.
Agitasjon
Bakgrunnen er at Ariel Sharon i går kveld kravde at dei palestinske leiarane skulle stanse all agitasjon for angrep mot israelske mål, før det blir snakk om forhandlingar.
Han ville også ha endringar i det palestinske skuleverket, slik at ikkje palestinske skuleborn vart opplærde i å hate Israel. Han nemnde ikkje det tidlegare kravet om avvæpning av palestinske grupper.
Sharon sa at han var klar for forhandlingar med dei nye palestinske leiarane, og avisa Haaretz skriv i dag at han ikkje lenger krev oppløysing av dei militante gruppene før det kan bli snakk om forhandlingar.
Det er dette som har skapt frykt blant ein del medlemer i Sharons eige Likud-parti. Han blir no skulda for å lefle med venstresida, og altså at han er blitt for mjuk overfor palestinarane. Truleg er det første gongen Sharon har blitt skulda for å vere ein mjuk mann.
Mot venstre
- Statsministeren går mot venstre. Han har alltid sagt at han vil føre ein kompromisslaus kamp mot terror, men no endrar han dette på ein måte han aldri tidlegare har gjort, sa Michael Ratson blant anna.
Sharon gjorde det også klart i går at han satsar på ein ny periode som israelsk statsminister etter valet i 2006.
Samstundes sa den nye PLO-leiaren Mahmoud Abbas i dag at det må bli slutt på det væpna kaoset i dei palestinske områda. Abbas har i fleire dagar opphalde seg i Gaza for å ha samtalar med leiarar for ulike palestinske grupper.
Lovløyse
Tidlegare har også statsminister Ahmed Qurie kome med liknande oppmodingar, etter at væpna menn drap to tryggingsvakter ved eit sørgjetelt for Yasir Arafat i Gaza by sist søndag.
I eit radioinvervju i dag tidleg sa Abbas at lovløysa i dei palestinske områda ikkje var i det palestinske folket si interesse, utan at han kom med konkrete tiltak for å få slutt på lovløysa. Han minte likevel om at det største problemet for palestinarane var den israelske okkupasjonen.
Mahmoud Abbas vil ha slutt på lovløysa i dei palestinske områda. (Foto: AP/Scanpix)