To Heddaprisar til Trøndelag Teater

Bård Lie Thorbjørnsen fekk Heddaprisen for scenografien til «Når vi døde våkner» av Henrik Ibsen, og scenekunstnar Lisa Lie fekk pris for særleg kunstnerisk innsats i stykket Blue Motell, som var ein samproduksjon med Trøndelag Teater.

Bård Lie Thorbjørnsen

Her tek Bård Lie Thorbjørnsen i mot Heddaprisen.

Lisa Lie

Scenekunstnar Lisa Lie fekk pris for særleg kunstnerisk innsats i stykket Blue Motell, som var ein samproduksjon med Trøndelag Teater.

Foto: Lars Erik Skjærseth / NRK

Til saman var Trøndelag Teater nominert til ni Heddaprisar. Det var berre Natinaltheatret som var nominert til fleire.

Teatersjef Kristian Seltun tykkjer to prisar er heilt greit.

– Det var ikkje særskilt mykje som var overraskande under utdelinga. Eg tykkjer det var ei fin utdeling i år. Me hadde sterke konkurrentar og utdelinga hadde tidenes beste konferansier, sa Seltun etter utdelinga.

Og han er ikkje skuffa.

– Me har hatt ei jamn stigning i talet på nominasjonar, men det har vore litt varierande kva me har fått av prisar. Dersom me tenkjer som dei gjer i sporten, så er me veldig godt representert i blant dei dyktigaste.

Høgt nivå

Seltun tykkjer nivået er høgt i norsk teater for tida.

– Norsk teater er inne i ein veldig god periode og det tykkjer eg kvelden i kveld viser. Debatten om teater inni og utanfor institusjonane er død. Det blir skapt veldig mykje bra teater i instituasjonane for tida. Det er sikkert provoserande for nokon at eg seier det, men eg er lei den debatten. heldt han fram.

– Det er så mange dyktige scenografar. Det er så mykje godt arbeid med skodespelarane. Eg har følgt norsk teater tett i 20 år og samla sett skjer det veldig mykje bra.

Fantastisk

Bård Lie Thorbjørnsen

Scenograf Bård Lie Thorbjørnsen fekk eit heilt spesielt forhold til Ibsen-stykket «Når vi døde våkner».

Foto: Lars Erik Skjærseth / NRK

Bård Lie Thorbjørnsen fekk Heddaprisen for scenografien til «Når vi døde våkner» av Henrik Ibsen, som var satt opp ved Trøndelag Teater.

– Det er fantastisk. Kjempegøy. sa Thorbjørnsen etter utdelinga.

Han seier han har eit spesielt forhold til akkurat den produksjonen.

– Det var eit arbeid eg var spesielt nøgd med, som eg tykte klaffa veldig. Det var spesielt å jobbe med det stykket av Ibsen, som var det siste. Då er denne prisen ei stadfesting på at eg har nådd fram.