Ved Byåsen videregående skole, der Lisa er elev, har rektoren heist flagget.
- Dette var den beste julegåva familien kunne få, og vi her på skulen har heist flagget for å markere at Lisa er funnen, seier rektor Knut Wold ved Byåsen videregående skole, til NRK Trøndelag.
Den 19 år gamle kvinna, som er hjerneskadd, forsvann frå heimen sin på Byåsen klokka 16.50 i går ettermiddag.
Politiet gjennomførte dør-til-dør-aksjonar for å få opplysningar om den sakna kvinna. 100 personar frå politi, Røde Kors og sivilforsvaret søkte etter kvinna i heile natt. Måndag føremiddag blei ho funnen i ulendt terreng i området Selsbakk-Romolslia, ikkje så langt frå heimen sin.
- Det var redningshelikopteret som fann kvinna i nærleiken av det som har vore leiteområdet til politiet i heile natt, seier operativ uteleiar ved Sør-Trøndelag politidistrikt, Hanne Finanger, til NRK Trøndelag.
Sendt til sjukehus
19-åringen blei funnen ute, men politiet veit ikkje om ho har vore ute heile tida. Dei veit heller ikkje kva tilstand ho er i.
- Kvinna er sendt til St. Olavs Hospital, seier Finanger.
Adressa.no snakka med mora til Lisa, Inger Valør, på St. Olavs Hospital etter at jenta blei funnen. Ho fortel at Lisa skal ha vore så nedkjølt at ho hadde begynt å kle av seg då ho blei funnen.
- Ho hadde ein kroppstemperatur på under 30 grader, så det var i siste liten, seier Valør.
Glad og letta rektor
19-åringen er elev ved Byåsen videregående skole. Både elevar og lærarar ved skulen deltok i leitinga etter medeleven. Rektor var lenge både redd og uroa, og gladmeldinga om at Lisa var funnen i live gjorde svært godt.
- Dette var kjempegodt. Vi har vore veldig redde og følt med ho som har vore ute. No er vi kjempeletta, seier rektor Knut Wold ved Byåsen videregående skole, til NRK Trøndelag.
Han la raskt ut meldinga på skulen si interne veggavis, og applausen let ikkje vente på seg.
- Det var godt å høyre at dei klappa når eg gjorde det kjent at Lisa var funnen, seier Wold.
Spente elevar
Då det blei kjent at ein av elevane ved Byåsen videregående skole var sakna, opna rektoren dørene på skulen.
- Leitemannskapa fekk optimale tilhøve å arbeide under og fleire av lærarane, som kjente Lisa, leitte etter henne i natt, seier Wold.
Han legg til at elevane har vore stille, spente og søkande etter korleis det har gått.
