Her er det blodraudt: Stor skogbrannfare sjølv på kysten

– Bakken, jord og lyng er veldig tørt, seier Hans-Peter Sørem, vaktsjef i Tromsø brann og redning.

Det har regna lite over ein lengre periode, og no blir det også høge temperaturar.

Meteorologane har sendt ut farevarsel for skogbrann i store delar av Nord-Noreg.

– Det tek utruleg fort fyr, åtvarar Sørem.

To skogbrannhelikopter er sett inn i beredskap i Alta og Narvik.

DSBs skogbrannfareindeks viser at det er stor fare for skogbrann, sjølv heilt ute på kysten.

Forbode å tenne bål

Det har vore fleire skogbrannar i Noreg denne sommaren.

Denne veka er gradestokken venta å bikka 25 grader i Troms, Nordland og Finnmark.

I Telegrafbukta i Tromsø har fleire teke turen ut for å nyta finvêret. Der er også fungerande brannsjef Joakim Pedersen.

Han ser raskt ein eingongsgrill som står på bakken. Den er sett på det vesle metallstativet som følgjer med.

– Her burde eingongsgrillen stått oppå nokre steinar for å verna vegetasjonen under, seier Pedersen.

Kollega Sørem ber folk vere forsiktige.

– Har dei tenkt å gjere noko med grilling, bør dei absolutt sikre seg med vatn, og sørgje for at alt er dynka når dei er ferdige. Men det er faktisk forbode å gjere opp eld.

I Noreg er det generelt bålforbod mellom 15. april og 15. september.

Ølflaska di kan starte brannar

Slik som tørken er no, kan brannar også startast utan at ein tenner bål.

Det er faktisk nok å gløyme brus, ølflaska eller noko anna av glas som blir liggjande i solsteika.

– Det blir som eit forstørringsglas. Solstrålen blir konsentrert ned mot tørt underlag, så kan det fort ta fyr. Det har vi hatt døme på tidlegare. Folk må ta søpla med seg, rår Sørem.

Sist gong det kom noko regn av betydning i Tromsø var 25. juni. Det var likevel berre beskjedne 6,4 millimeter.

Og det blir tørt og varmt i nord éi veke til.

– Det er litt uvanleg at det er så lang tørke, men at vi får slike vêrsituasjonar som vi har no med lite nedbør, det skjer jamleg, seier vakthavande meteorolog Per Egil Haga.