Meiner Raudt driv politisk spel om Melkøya: – Det er nok no

– Ein kan ikkje sitte på Løvebakken og meine at vi skal stoppe industriutvikling og industriarbeidsplassar i nord.

Det meiner Kjell Giæver, direktør i Arctic Energy Partners, som er eit leverandørnettverk for energibransjen i nord.

Måndag la Raudt fram fem forslag for Stortinget for å stanse vidare elektrifisering av gassanlegget Melkøya utanfor Hammerfest.

– Vi kjenner på frustrasjon og litt sinne rundt det. Det er nok politisk spel rundt arbeidsplassar og samfunnsutvikling i Finnmark no, seier Giæver.

– Bør ikkje stoppast

Leverandørindustrien i Nord-Noreg leverte i 2024 petroleumsverdiar på 6,4 milliardar kroner.

2,9 milliardar kom frå anlegget på Melkøya aleine.

– I dei tala ligg det fleire tusen nordlendingar, tromsværingar og finnmarkingar som går på jobb kvar dag, seier Giæver.

At Raudt igjen vil diskutere elektrifiseringa påverkar arbeidsforholda, meiner direktøren.

– Det er ein arbeidsplass, ikkje noko du skrur av og på frå år til år.

– Føreseielegheita til desse prosjekta, som krev investorar, kapital og at nokon tør å satse i nord, blir sette på spel.

Arctic Energy Partners er nettverket mellom samarbeidspartnarar og leverandørindustrien. Ifølge Giæver meiner selskapa det er lite hald i Raudts ønske.

– Dette oppfattar vi ikkje som realistisk i det heile. Kontrakten er sett, ein bygger fabrikken og folk går på arbeid kvar dag. Prosjektet er vedtatt og bestemt, seier han og fortset:

– Ein kan ikkje stoppe det, og ein bør ikkje stoppe det. Det er eit bra prosjekt for å bygge samfunnet i nord, og ikkje minst for å kutte utslepp.

– Tar all krafta

Raudt-politikar Sofie Marhaug seier at partiet er på det reine med at delar av elektrifiseringa ikkje kan reverserast.

– Dette forslaget handlar om den vidare elektrifiseringa. Det handlar om å stoppe vindkraftutbygginga i Finnmark, ta vare på naturen og hindre veldig, veldig høge straumprisar.

Ifølge Marhaug har elektrifiseringa negative konsekvensar i Nord-Noreg og i Finnmark fylke.

– Elektrifiseringa tar opp all krafta, gjer at andre ikkje kan etablere seg og gir høge straumprisar. Vi meiner at det er heilt rett og rimeleg, i eit demokrati, og ta det opp til diskusjon igjen i Stortinget.

Uttalen for leverandørnettverket om at planen er useriøs, sender Marhaug i retur.

– Det som er useriøst er vedtaket som regjeringa gjorde om å elektrifisere Melkøya, og samtidig skaffe nok erstatningskraft til den elektrifiseringa innan 2030. Det var og er eit urealistisk forslag.

Bekymrar ikkje arbeidarane

Terje Nilsen er leiar i fagforeininga Styrke Equinor Hammerfest. Han trur dei tilsette på Melkøya ikkje bekymrar seg for arbeidsløyse med det første.

– Eg veit ikkje om det er så mange som festar lit til at det vil bli ein reell omkamp. Folk er veldig avventande, og vi ser jo på øya at det går sin gang, seier han.

Nilsen poengterer at dei er vande med medieoppslag rundt arbeidsplassen sin.

– Det er ikkje berre politikken som påverkar Melkøya. Vi har også mange medieoppslag om hendingar, og det er nok av skriveri rundt Melkøya kvar einaste dag. Det er kvardagen vår at det blir skrive og meint mykje.