Regjeringa la i dag fram stortingsmeldinga om terrorberedskap. Sigvald Oppebøen Hansen er medlem av Justiskomiteen på Stortinget og skal vere med på å behandle stortingsmeldinga.
Han er glad for at stortingsmeldinga legg opp til å styrke politiets utrykningseiningar i distrikta og styrke nærpolitiet.
– Fleire politifolk skal øve meir på skarpe oppdrag og talet på politifolk som deltek i lokale utrykningseiningar blir auka frå 800 til 1200, seier Oppebøen Hansen i ei pressemelding.
Får tilgang til IT-system
Det skal også bli høve til å utdanne fleire politifolk til å delta i lokale uttrykningseiningar.
– Ved å utdanne fleire politifolk til å delta i lokale uttrykningseiningar, styrkar vi politiet si evne til å handtere store hendingar over heile landet, seier Oppebøen Hansen.
Han meiner det også er viktig at politibilane får nettbrett med direkte tilgang til politiets IT-system.
– Det er eit stort skritt i rett retning at fleire oppgåver kan løysast ute i felten. Målet er eit politiet der effektiv bruk av IKT-verktøy er ein integrert del av arbeidsmetodane, seier Oppebøen Hansen.
Meir til beredskapstiltak
Sigvald Oppebøen Hansen meiner stortingsmeldinga følgjer opp Gjørv-kommisjonens rapport etter 22. juli.
Regjeringa foreslår å auke statsbudsjettet med 109 millionar kroner til nye beredskapstiltak, i tillegg til 1,5 milliardar kroner som alt er løyvd i justisdepartementet til oppfølging av terroren etter 22. juli.
– Eg er fornøgd med regjeringa si stortingsmelding om terrorberedskap som blei lagt fram i dag, seier Oppebøen Hansen.