– Folk sender ofte twittermeldingar i affekt, og forstår ikkje at bodskapen vil bli lest av fleire personar, seier Jørgen Helland, rådgjevar i Halogen AS, om kvifor offentlege personar ofte ytrar seg meir direkte på Twitter enn andre stader.
Han underviser i Noregs første høgskulekurs i sosiale medier.
På idrettsarenaen fekk Håvard Bøkko brei omtale då han kalla fleirtalet av representantane på Skøytetinget for «suppehuer».
Dette fordi han var imot tingets avgjerd om å avvikla fellesstart på 10 000-meter i allround-NM neste år.
- LES OGSÅ: «Flertall av suppehuer på tinget i år»
Store negative konsekvensar
– Eg visste at det ville komme reaksjonar på det, og tenker at eg ikkje må slenge så mykje drit framover, seier Bøkko når han blir konfrontert med twittermeldinga.
Det kan få følger for omdømet til ein person om han eller ho skriv noko som dei trur ikkje blir plukka opp og bretta ut i media, meiner Helland.
– Dei negative konsekvensane kan vere store. Sidan det er så umiddelbart og raskt er det lett å vere sleivete i uttrykksforma oppnår ein gjerne at media lagar sak om bodskapen.
(artikkelen held fram under biletet)
– Kva er årsaka til at Twitter er populært hjå fleire idrettsutøvarar?
– Det er veldig enkelt å nå ut til dei som er interessert i å følga dei veldig raskt. Dei treng ikkje gå gjennom journalistar. Det går raskt å legga ut tekst som gjer at dei enkelt kjem ut med sin bodskap, seier Helland.
- Er det greit at offentlege personar ytrar seg som dei vil på Twitter? Diskutér!
Heftig Twitterstorm
Men ikkje bare Bøkko har vore i hardt vêr etter uforsiktige ytringar på Twitter den siste tida.
Fagbladet Journalistens redaktør Helge Øgrim tabba seg ut før helga då han ved ein tastefeil namnga tv-kjendisen som blei arrestert for valdtekt.
Feilen, som blei til ei twittermelding, blei plukka opp i media og skapte oppstyr.
I England blei Premier Leagues storstjerne gjennom fleire år, Ryan Giggs, offer for Twitters openheit då han av fleire tusen brukarar blei namngiven som utru med supermodell Imogen Thomas.
(artikkelen held fram under biletet)
Mediene fekk riktig nok ikkje lov til å namngje Giggs, men på Twitter var det full openheit rundt spelaren og «alle» på nettstaden fekk vite at Giggs var den utru proffspelaren.
Det har med andre ord storma både her og der på mikrobloggtenesta dei siste vekene.
– Tåpeleg
«Håper det blir din siste bursdag», skreiv Christoffer Thomsen, leiar for Framstegspartiets Ungdom i Bergen, om Dagbladets Marie Simonsen på Twitter onsdag.
Thomsen lot seg engasjere av ein debatt på Twitter om konkurranseutsetjing av parkdrift, og skreiv difor ein melding som blei tolka som at han ønska Simonsen død.
– Eg ble veldig medriven og det gjekk for langt, diverre. Det blei veldig tåpeleg, seier Thomsen til NRK.
Bøkko: – Morosamt med meir støy
Etter «suppehue»-kommentaren retta mot Skøytetinget trur Håvard Bøkko at Twitter er meir populært når nettstaden blir brukt som frikanal for direkte ytringar.
– Folk legg kanskje merke til at ein er frittalande på Twitter. Det er mykje meir morosamt når det blir støy der, seier Bøkko.
Bør tenke seg om
Rådgjevar Helland er også einig i at det må vere eit visst spenningsnivå på meldingar, som i Bøkko sin, for at folk skal følga med på mikrobloggnettstaden. Men mange meldingar kan også bli lese ut av kontekst.
– Dei kan bli misforstått, og eigaren av bodskapen framstår då ofte som stor i kjeften.
Han oppfordrar kjende personar til å vere meir forsiktige på Twitter i framtida.
– Dei fleste bør tenke seg litt meir om.