Dagens 9. etappe i Tour de France skulle bli verre enn alle etappar så langt.
Ein massevelt gjorde det først kaotisk i feltet, og resulterte i at mellom andre Astanas samanlagtfavoritt Alexandre Vinokourov måtte bryte.
Etappen blei endå meir skandaløs då ein fransk TV-bil traff to syklistar.
Seinare på kvelden melde Tour de France-leiinga at sjåføren no er utestengd på livstid.
– Kvålsvoll: Heilt katastrofe
Med vel 35 kilometer igjen kom TV-bilen opp bak utbrytargruppa og traff både Juan Antonio Flecha (Sky) og Johnny Hoogerland (Vacansoleil).
Hoogerland enda opp i grøfta, og var blodig og oppskrapa etter møtet med eit piggtrågjerde.
– Vi såg ikkje uhellet då vi sat i en bil lenger bak i feltet, men det kjem til å bety alvorlege sanksjonar, seier Tour-direktør Jean-Francois Pesheux til dansk TV 2.
- To køyrety involvert i ulukker så langt i touren. Korleis opplever du det som skjer? Diskutér nedst!
– Slikt skal ikkje skje. Det var ei forferdeleg ulukke, seier Hoogerlandt til TV2 etter etappen.
Thor Hushovds trenar, Atle Kvålsvoll, fekk heller ikkje med seg velten då det skjedde, men blei sjokka då han såg alt på monitor.
– Eg måtte sjå reprisen for å tru at det var sant. Kva den sjåføren haldt på med veit eg ikkje. Det var heilt katastrofe, seier Thor Hushovds trenar Atle Kvålsvoll til NRK etter uhellet.
– Det skjer så ekstremt mye. Det er mange ting som ikkje burde skje, som episoden i dag. Det er smale vegar og det må visast meir hensyn, noko bilar og motorsyklar også må akseptere meir, seier Thor Hushovd til NRK.
(artikkelen held fram under biletet.)
Tårevåt Hoogerland tok klatretrøya
Utruleg nok var Flecha oppe igjen etter møtet med asfalten, men hadde store rifter i trøya.
Nederlandske Hoogerland fekk etter kvart behandling, og kom seg tilbake på sykkelen etter fleire minutt i grøfta.
Syklisten kom seg til mål, og overtok med det klatretrøya i touren. Tårene kom i frustrasjon over ulhellet då han stod på podiet.
– Arrangøren har orsaka seg. Eg skal ikkje skulde på nokon, men det var ei forferdeleg ulukke, fortel Hoogerland.
(artikkelen held fram under biletet.)
Kvålsvoll: – Ryttarane vil markere dette
Thor Hushovds trenar, Atle Kvålsvoll, skreiv følgande på Twitter etter den dramatiske episoden:
«Fare for at blir en del bytte av sjåfører til i morgen. Katastrofekjøring av den franske TV bilen»
ESPN-reporter Bonnie D. Ford reagerte med sjokk i kaoset:
«You have got to be kidding me.»
Dette er andre gangen i årets Tour de France at eit køyrety treff utøvarar.
I førre veke blei ein fotograf på motorsykkel kasta ut av rittet etter å kollidert med den danske Saxo Bank-ryttaren Nicki Sørensen.
– Eg trur ryttarane vil markere dette med eitt eller anna i morgon. Dette går jo på sikkerheiten til syklistane. Er det ein ting dei er opptatt av så er det dette, seier Kvålsvoll.
No trur Hushovds trenar at det blir oppvaskmøte i touren.
– Det blir eit stort internmøte med sportsdirektørane der arrangøren må forklare seg og komme fram til ei løysing på korleis ein skal forhindre fleire episodar, seier Kvålsvoll.
Thor mista trøya
Spanske Luis Leon Sanchez vann søndagens 9. etappe av Tour de France.
Franske Thomas Voeckler tok andreplassen og overtok den gule ledertrøya frå Thor Hushovd.
Sanchez spurta frå restane av et utbrudd på dei siste meterane opp til Saint-Fluor og er no også nummer to i samandraget.
– Å ha trøya så lenge har vore fantastisk. Eg har hatt den lenger enn eg trudde, seier Thor Hushovd til TV2 etter målgang.
(artikkelen held fram under biletet.)
Mannefall hjå storkanonene
Søndagens etappe har vore særs dramatisk. Alexandre Vinokourov og Jurgen van den Broeck, som begge var ansett som ryttarar som kunne true Alberto Contador og Andy Schleck samanlagt, har brutt i løpet av dagen.
Dei to var involvert i ein stygg velt i ei utforkøyring. Vinokourov brakk lårbeinet etter å ha susa rett inn i skogen i 70-80 kilometer i timen.
David Zabriskie, Wout Poels, Amets Txurruka, Pavel Brutt og Frederik Willems måtte også bryte.
– Thor kunne enno hatt trøya
Hadde det ikkje vore for denne store velten, kunne Thor Hushovd overraska med å halde på trøya også etter dagens etappe, trur Kvålsvoll.
Han trur utbrytargruppa ville fått det tøft med å halde avstanden heilt til mål.
– Surt for Thor. Han ville sannsynlegvis hatt samanlagtleiinga også etter dagens etappe, seier Kvålsvoll.
Contador fekk juling
Og ikkje nok med det: Alberto Contador gjekk også i bakken. Feltet køyrde førehaldsvis roleg og rett fram, då superstjerna plutseleg blei puffa hardt i sida og stupte i asfalten.
Om det var tilsikta frå ryttaren som såg ut til å vere fra Katusja-laget, veit ein ikkje enno.
Contador landa hardt på skinka, og hadde tydeleg vondt. Han måtte få ny sykkel, men kunne fortsette etter kvart.
Følgande ryttarar har så langt brote årets sykkelritt
Etappe i parentes:
Jurgen Van de Walle, Belgia (4): hofte.
Ivan Velasco, Spania (5): kragebeinsbrot.
Janez Brajkovic, Slovenia (5): kragebeinsbrot.
Bradley Wiggins, Storbritannia (7): kragebeinsbrot.
Tom Boonen, Belgia (7): hjernerystelse.
Remi Pauriol, Frankrike (7): kragebeinsbrot.
Chris Horner, USA (7): nasebrot, hjernerystelse og leggskade.
Benat Intxausti, Spania (8): håndledd.
Jurgen Van den Broeck, Belgia (9): skulderbrot.
Alexandre Vinokourov, Kasakhstan (9): lårbeinsbrot.
David Zabriskie, USA (9): håndledd.
Amets Txurruka, Spania (9): skade ukjend.
Pavel Brutt, Russland (9): skade ukjend.
Frederik Willems, Belgia (9): kragebeinsbrot.