LSK-fansens misnøye mot trenaren etter kvalik-plass: – Reis heim

"Søppel" var blant tilropa han og spelarane fekk på veg til garderoben etter 0-0-kampen mot Sarpsborg 08.

– Det er lett å forstå at folk er forbanna når vi ikkje har vunne fotballkampar på ei stund, og at våre prestasjonar ikkje er gode nok, seier Lillestrøm-trenar Jörgen Lennartsson.

Han og spelarane blei bua av bana etter 11 kampar utan siger. Sjølv tok Lennartsson reaksjonen med fatning.

– Då blir det mykje fokus på trenaren. Slik er det, og eg har ikkje problem med det. Eg tek ansvaret fullt ut.

No ventar kvalik-kampar mot Start 7. og 11. desember.

– Så kan vi diskutere om vi skal ha fotballkampar 11. desember i Norge. Men det er ei anna sak.

Det var uvisst til aller siste spark i det svært så vinterlege og uuthaldeleg spennande nedrykksdramaet i eliteserien.

Ranheim nær sensasjon

Seks lag var innblanda i nedrykksdramaet før den siste runden. Det var duka for drama. Og drama blei det.

Det enda med at Ranheim blei sist etter eit titanisk drama på Lerkendal.

– Vi kjem til å byggje bra opp igjen, men dette sit i, seier Ranheims keeper Even Barli.

Tromsø må også ned, etter ein skilleg snøballkrig på Alfheim. Lillestrøm må ut i kvalik etter 0–0 mot Sarpsborg 08. Mjøndalen slo Vålerenga og berga plassen. Det gjorde også Sarpsborg etter poenget på Åråsen.

– Vi er skuffa, dette skulle vi avgjort i dag, seier LSK-veteran Frode Kippe etter det som skulle blitt hans siste kamp. No kan han få to kvalik-kampar mot Start.

– I dag skapte vi knapt nok sjansar, og då er det vanskeleg. Eg er skuffa no, men vi skal omstille oss til to nye kampar. Dette skal nok gå bra, seier Kippe.

– Eg har aldri spela kvalik før. No får eg vere med på det også.

Fire lag med like mange poeng

Og berre målskilnaden skilde dei fire måla. Tromsø måtte ned med 19 minusmål, LSK på kvalik med minus 15. Mjøndalen med minus 14 og Sarpsborg 08 med minus 10 berga seg. Strømsgodset var også i faresona, men berga seg med siger i Kristiansund.

Fredrik Brustad sikra sigeren mot Vålerenga med 1–0, og det var nok til fornya kontrakt. Ikkje sidan 1986 har Mjøndalen makta å halde seg på øvste nivå.

– Det var ufatteleg herleg. Eg kjenner meg så glad som eg ikkje trur eg har vore i heile mitt liv, seier Mjøndalens trenar Vegard Hansen til NRK.

– Det er så godt å ha greidd det etter det presset vi har vore under dei siste vekene, og så klart det heilt på tampen. Det ser du sikkert på meg, seier Hansen medan smilet går nesten heilt rundt.

Han vedgår at han var nervøs på sidelinja i kampen mot Vålerenga. Uavgjort hadde ikkje vore godt nok. Men han hadde god tru på siger mot Vålerenga og dermed å overleve.

– Alle andre hadde vanskelege kampar. Vi såg på sjansane var veldig gode. Hadde vi rykka ned, hadde eg kjent veldig på ansvaret.

Drama på Lerkendal

Ei kort stund i 2. omgang låg alle dei seks laga på 30 poeng, berre målskilnaden avgjorde.

Den største dramatikken small på Lerkendal, der Trondheim-naboane Rosenborg og Ranheim møttest.

Ranheim låg sist før runden, men selde seg dyrt mot Rosenborg. Dei leia 1–0 ved pause og var lenge oppe på kvalikplass. Så snudde Rosenborg med to mål av midtstoppar Even Hovland, og Ranheim var sist igjen.

I 40 sekund var også Rosenborg på bronseplass og klar for europaliga-plass. Så utlikna Michael Karlsen for Ranheim med sitt sjuande mål for sesongen, og sende Rosenborg ut av Europa igjen. I fire minutt. Då var det Samuel Adegbenro som var på rett plass til rett tid og banka inn 3–2. Då gjorde det ingenting at Mike Jensen bomma på straffe på overtid.

I Tromsø-garderoben var stemninga derfor laber.

– Vi sit med ei kjensle av tomheit, hjelpeløyse og skam, seier TILs Simen Wangberg.

– Det er det verste eg har opplevd som spelar. Du skuffar så mange. Når vi skal tilbake neste år, skal det vere med ei forplikting om at vi skal gjere det betre, seier han.

15 minutt snøpause i Tromsø

Det oppstod ekstra drama då kampen i Tromsø måtte avbrytast etter ein dryg halvtime i første omgang. Snøfallet gjorde det umogeleg å spele, dommarane kommanderte spelarane inn i garderoben medan traktorane måka bana. Måkepausen varte i 15 minutt før spelet kom i gang igjen.

Dermed blei også andre omgang i dei andre kampane med lag i nedrykksfare utsett tilsvarande.

Men det vekte reaksjonar at andre omgang av Haugesund – Odd blei sett i gang nesten ti minutt før Rosenborg – Ranheim, ettersom det indirekte kunne ha innverknad på nedrykksstriden.

Etter snøpausen scora Oliver Edvardsen for Stabæk og sende Tromsø under nedrykksstreken. Edvardsen feira med å stupe ut i ein av snøhaugane ved sida av bana.

– Det var godt. Og snøen var mjuk, sa han til Eurosport etterpå.

Runar Espejord utlikna etter pausen, då snøkavet hadde gitt seg. Men det var ikkje nok for Tromsø.

• NRK.no følgde dramaet minutt for minutt.