Eivind Henriksen tok eit historisk sølv i sleggekast under OL i Tokyo. Om tre år blir leikane arrangerte i Paris, og på spørsmål om målet er å attskape bragda frå Tokyo, er han offensiv.
– Ja, absolutt. Det er jo eitt steg til, så det er naturleg å tenkje på den gullmedaljen, seier han til NRK.
Men sjølv om han går for OL-gull i 2024, har han ingen planar om å seie opp kvardagsjobben.
– Liker å komme meg litt vekk
Henriksen ønskjer nemleg å halde fram som bilflyttar, heller enn å bruke all si tid på idretten.
– Hadde ein berre sete heime, ville ein berre ha tenkt på friidrett og sleggekast. Eg liker å komme meg litt vekk og snakke med vanlege folk, seier han.
Fleire potensielle nye sponsorar har kontakta han etter OL-sølvet, men Henriksen fortel at ingenting er avklart.
Eivind Henriksen. Her frå ei økt som instruktør for friidrettsskulen til landslaget.
Foto: Annika Byrde / NTB– Viss eg hadde slutta i jobben ville det uansett ikkje vorte meir trening, berre meir tid til restitusjon.
Sjølv med tre arbeidsdagar i veka har ikkje Henriksen problem med å få treningskvardagen til å gå opp.
– Eg har framleis ni treningsøkter. Doble økter dei dagane eg ikkje er på jobb. Det som kunne vore eit alternativ er å jobbe 60 % på hausten og vinteren, og ha meir fritid på nyåret inn mot sesong.
Konkurrent blir kjærkommen treningsvenn
Sleggekastaren har lenge vore einsam i satsinga i Noreg, og seier at det mellom anna er det kollegiale som trekkjer han til sjåførjobben.
Når opptreninga startar igjen til hausten, blir kollegiet for sleggetrening likevel dobla. Noregs nest beste sleggekastar, Thomas Mardal, vender heim frå USA.
– Det hadde jo gjort det meir spennande i treningskvardagen. Ein har jo tunge dagar på trening, då hadde det vore betre med ein kompis der som kunne løfta ein opp.
Thomas Mardal, her frå ei turnering i Arkansas, USA. 24-åringen herjar blant sleggekastarane på college-nivå i USA, og har ein rekord på over 76 meter. Til hausten vender han heim.
Foto: Kirby Lee / ReutersNoregs to beste sleggekastarar har ikkje trena så mykje saman, men har møttest på ein treningsleir i USA i 2019, og når Mardal er på ferie i Noreg.
– Det er alltid kult det. Han er nok litt dårlegare enn meg, reint teknisk, men så er han sterkare enn meg i vektrommet. Så eg trur vi begge kan lære mykje av kvarandre og «pushe» kvarandre til å bli betre.
