Strømsgodset-trenaren var svært godt fornøgd med 0–0 og eitt poeng med seg heim frå Viking Stadion.
– Viking er eit hakk betre og har fleire sjansar, men vi kom hit for å forsvare oss på ein god måte, sa Deila direkte på TV 2 etter kampen.
Han var klar på at dei tok sine forholdsreglar. Mange baklengs og ei visse om dårleg grasmatte i Stavanger, gjorde at ein defensiv kampplan var lagt opp.
– Vi har heller ikkje for å vane å ta poeng her, så vi er fornøgde med eitt poeng. slo Godset-trenaren fast.
For det var heimelaget som kom nærast i kampen der ballen rett og slett ikkje ville i mål.
Kwarasey hindra islandsk scoring
Frå kampstart viste derimot begge lag at dei gjekk for tre poeng. Laga var offensive, men ei grasmatte nettopp ute av vinterdvalen sette ein stoppar for det gode pasningsspelet.
Sjansane uteblei òg ei god stund, men så losna det for heimelaget. Etter 27 minutt kom den første store moglegheita.
Trond Erik Bertelsen blei spelt fri på kanten og fekk slått inn. Framfor mål fekk Veton Berisha avslutte, men ballen sklei like utanfor stolpen.
Strømsgodset kom berre til halvsjansar og begge lag prøvde seg frå distanse. Men så burde det plutseleg stått 1–0.
Yann-Erik de Lanley vann ballen høgt og spelte kjapt opp til Steinthór Thorsteinsson. Frå skrått hald fekk islendingen avslutte uforstyrra, men ei glimrande redning frå Adam Larsen Kwarasey hindra scoring.
– Ingen av laga var gode
Trass i to sjansar litt uti første omgang var Viking-trenar Kjell Jonevret langt frå fornøgd.
– Ein dårleg fotballkamp. Det var lite å glede seg over i første omgang, ingen av laga var gode, meinte Jonevret til TV 2.
Svensken var langt meir fornøgd med det spelarane fekk til i andre omgang.
– Det måtte bere eller breste, og då blei det betre. Vi må halde fram slik og tørre framover.
Alltid to centimeter unna
Like etter pause var Berisha nære igjen etter innlegg frå de Lanley, men ei lang tå frå Godset-forsvaret gjorde at det berre blei corner.
Etter 51 minutt var Thomas Sørum nære for Strømsgodset, men igjen var det nokre centimeter mellom scoring og ikkje scoring.
Utover i kampen var det Viking som tok mest tak i kampen. Etter 53 minutt var Kwarasey på plass då Björn Daniel Sverrisson prøvde seg frå distanse.
Mot slutten av kampen skulle Viking skulle kanskje hatt straffe. I tillegg burde både Strømsgodset og heimelaget scora på overtid. Men scoringa kom aldri.
– Vi var nærast, det var vi. Vi skaper sjansar og med litt hell hadde vi fått ballen i mål, men eg vil ikkje ligge oppe og grine i natt, konkluderte Viking-trenar Jonevret om poengdelinga.
Eitt poeng til kvart lag gjer at Strømsgodset tek ein førebels tabelltopp med fire poeng, medan Viking er oppe i to poeng.
Deila: – Heilt annleis heime
Strømsgodset-keeper Adam Larsen Kwarasey var viktig for bortelaget med fleire gode redningar. Sjølv meiner han Viking ikkje var så nære.
– Dei har lyst å vinne og trykker på mot slutten. Dei skaper farlegheiter, men det er ikkje all verda, sa keeperen til TV 2.
Han er klar på at eitt poeng er svært godkjent i Stavanger – spesielt med mange mann skadde.
– Eg er imponert over eitt poeng her med så mange i backrekka ute.
Det same trekte trenar Ronny Deila fram.
– Vi har bytta ut store delar av laget frå i fjor. I tillegg har vi tre sentrale spelarar ute, så eg er stolt av forsvaret i dag. No tek vi med oss dette vidare, og det blir ein heilt annan fotballkamp heime mot Aalesund i neste runde.