NRK Meny
Normal

Langt unna hall-mål: – Ein forferdeleg situasjon for norsk ishockey

Norges Ishockeyforbund er langt unna målet dei sette seg om nye ishallar innan 2012. Likevel set forbundet seg nye hårete mål fram mot 2020.

Ole-Jacob Libæk

MÅL: Ishockeypresident Ole-Jacob Libæk vil ha fortgang i utbygging av ishallar i Norge.

Foto: Scanpix

– Stockholm aleine har jo fleire ishallar enn Norge totalt sett. Det er ein forferdeleg situasjon, seier ishockeypresident Ole-Jakob Libæk til NRK.no.

Norges Ishockeyforbund sette seg mål om å ha 60 ishallar i Norge innan 2012. Fasiten er 43.

– Det er veldig viktig å setje seg mål og ha noko å strekkje seg etter. Då veit ein i alle fall kva ein siktar etter, seier han.

Vil ha 50 nye innan 2020

Roy Johansen

FOR SEINT: Landslagstrenar Roy Johansen meiner utbyggjinga av ishallar går for tregt.

Foto: Larsen, Håkon Mosvold / NTB scanpix

Landslagssjef Roy Johansen har ei rekkje gonger etterlyst større tempo i utbygging av nye anlegg.

– Det går rett og slett alt for tregt. Både når det gjeld treningshallar og konkurransearenaer, seier Johansen til NRK.no.

Innan 2020 er målet å ha på plass 50 nye hallar - altså i underkant av 100 totalt. Det tilsvarar rundt fem nye hallar i året.

– Det ser ut til at vi skal klare sånn nokolunde, seier ishockeypresidenten og viser til at fleire hallar er under planleggjing.

– Eg håpar det blir fleire. Vi treng 150 for å vere nokolunde på linje med nasjonar vi konkurerer med, legg han til.

– Noko må skje

Per i dag er Norge milevis bak nabolanda Sverige og Finland når det gjeld talet på ishallar. I Sverige har dei over 400 ishallar, medan Finland har nær 400.

Det norske landslaget levert sterke resultat dei siste åra. Sidan 2008 har laget vore i kvartfinalen i VM tre gonger. I tillegg er dei kvalifisert til OL i Sotsji i 2014.

– Eg trur det blir vanskeleg å oppretthalde nivået både på yngre landslag og A-landslag dersom det ikkje kjem fleire anlegg og auka rekruttering, seier landslagssjefen.

Han viser mellom anna til at det berre i Gøteborg er over 40 ishallar, mot fem i Oslo.

– Det er ei konkurransevridning som er vanskeleg å leve med over tid. Vi er nøydde til å komme betre ut av det enn vi har gjort dei siste åra, dersom vi har lyst til å halde oppe rekruttering og vere ein A-nasjon i framtida, seier Johansen.

Oilers innviet sin nye hall

NY: Ishockeyforbundet nådde ikkje målet sitt med å få på plass 60 ishallar i Norge innan 2012. Bilete er frå Stavanger Oilers sin nye hall i Stavanger.

Foto: Erik Waage

Vil lære av Norge

Ifølgje ishockeypresidenten vekkjer prestasjonane til det norske landslaget oppsikt i utlandet. Mellom anna har både Sveits og Tyskland teke kontakt for å lære.

I Sveits er det rundt 25 000 registrerte hockeyspelarar, mot 7000-8000 i Norge.

– Det er land som vi har passert på rankinga som lurer på korleis det er mogleg å gjere det så bra med dei små ressursane vi har, seier han.

Siste nytt

Sendeplan

Kl. Program Kanal
EM feltritt: Terreng
EM feltritt: Terreng
Terreng
4-4-2 med Schau og Aune
4-4-2 med Schau og Aune
4-4-2 med Schau og Aune
Eliteserien: Lillestrøm - Vålerenga
4-4-2 med Schau og Aune
4-4-2 med Schau og Aune
4-4-2 Eliteserien fotball: Lillestrøm - Vålerenga
Toppidrettsveka