Rekdal har fått sparken i AaFK

– Det er sånn som skjer i fotball. Ein trenar vil alltid vere i ein utsett posisjon.

Det seier Kjetil Rekdal til NRK.no etter at kontrakten med Aalesunds Fotballklubb har blitt avslutta.

Rekdal kom til AaFK i 2008, og etter to cupgull og spel i Europa, har 44-åringen fått sparken.

– Det er sjølvsagt trist, og då er det slik at ein epoke er over. Då legg du eigentleg frå deg alt du hadde av tankar for 2013, dei berre kappar du. No får ein tenkje på noko anna, seier Rekdal.

Den tidlegare fotballproffen var ikkje sjølv på styremøtet til AaFK måndag kveld.

– Dei treng ikkje forklare

Rekdal blei oppringt av styret.

– Då dei ringte fekk eg opplese pressemeldinga. Då gadd eg eigentleg ikkje å høyre meir etter.

– Dei treng ikkje å forklare noko for meg, slår Rekdal fast til NRK.no.

Den første tanken som slo ned i hovudet på Rekdal var av den meir trivielle sorten.

– Det først eg tenkte var at eg no må endre turen min til Gran Canaria. Frå 29. desember til 19. januar, den må eg gjere noko med.

Avslutta etter styremøte

Måndag kveld hadde styret i Aalesunds Fotballklubb eit styremøte. Den mykje omtalte evalueringa blei der lagt fram og diskutert.

Etter over fire timar kom styreleiar Kjell Tennfjord og Henrik Hoff ut av møtet og møtte den oppmøte pressa i NRK og Sunnmørsposten.

– Styret i Aalesunds Fotballklubb har i møte i dag avgjort å avslutte kontrakten med hovudtrenar Kjetil Rekdal med umiddelbar verknad, opplyste styret i AaFK.

Sportsleg resultat er ikkje grunnen

Ifølgje ei pressemelding som styre har sendt ut, skal evalueringa ligge til grunn for sparkinga.

– Avgjersla er basert på konklusjonane som kjem fram av den evalueringa som er gjennomført for sesongen 2012.

– Dei sportslege resultata inneverande sesong er ikkje grunnen til styret si avgjersle.

• LES OGSÅ: Vil ha slutt på soloutspel i AaFK
• LES OGSÅ: – Aalesunds Fotballklubb er snart tomme for omdømmekapital

Då Kjell Tennfjord stilte til intervju like etter møtet var han ikkje veldig snakkesalig, men han kunne opplyse om at avgjersla blei einstemmig vedteke. (Sjå heile intervjuet med Tennfjord øvst i saka.)

– «Reka» kjem alltid tilbake

Kjetil Rekdal sin rådgjevar, Trond Mathisen, blei intervjua berre minuttet etter at nyheita sprakk.

– Eg fekk akkurat vite det sjølv, og dette er ei sak mellom Kjetil og klubben, sa Mathisen.

– Har Rekdal følt mistillit blant spelarane?

– Ikkje som eg er kjent med.

Mathisen er overtydd om at Rekdal raskt returnerer til trenarstolen i ein annan klubb.

– Han vil heilt sikkert halde fram som trenar. No skal han først få lov til å fordøye denne nyheita, men «Reka» kjem alltid tilbake.

– Har de vore i dialog med Vålerenga?

– Det har eg ingen kommentar til, avsluttar Rekdal sin rådgjevar.

I Aalesunds Fotballklubb er trenaransvaret, inntil vidare, i hendene til dei andre i dagens trenarteam.

Oppsummerer åra som ein suksess

– No må eg ein tur på kontoret og pakke med meg tinga mine. Eg må finne eit tidspunkt, seier Kjetil Rekdal til NRK.no.

– Korleis vil du oppsummere åra dine i AaFK?

– Dei har vore svært suksessfulle. Mange unge spelarar har blitt integrert og AaFK har skaffa spelarar av internasjonal toppklasse.

– Det har vore mykje positivt. Sesongen i år har ikkje vore enkel. Det har vore frustrerande med lite folk på treningsfeltet, eigentleg vanskeleg å få utvikla oss vidare, seier Rekdal.

– Køyre ungane i barnehagen

No vil den tidlegare AaFK-trenaren gå gjennom kva han ikkje er fornøgd med, og kva som kunne vore gjort annleis i tida i Ålesund.

– Det er sikkert ein del som kunne vore gjort annleis. Det vil alltid vere slik, men det å brette ut i media er ingen vits.

– Kva tenkjer du om framtida no då?

– Det veit eg ikkje. Fotballen har vore livet mitt heile tida, så det er naturleg å tenkje i dei baner. Men like etter å ha fått melding om at du ikkje lenger er trenar går ein ikkje å tenkjer på det

No tek Rekdal livet heilt med ro.

– I kveld tek eg meg eit stort glas med kald cola og ein matbit. Så legg eg meg, før eg skal køyre ungane i barnehagen i morgon tidleg. Så får vi sjå kva som skjer deretter. Men mi tid som AaFK-trenar er ferdig i dag, og då er det ikkje noko meir å føye til, avslutta Rekdal.