– Det er litt spesielt. Eg er ikkje meir samansett som menneske enn at eg synest det vil vere feitt, seier ein smørblid Pål André Helland til NRK.
33-åringen stråler om kapp med sola når han møter NRK på Åråsen, kor Lillestrøm sikra seg ein plass i cupfinalen 20. mai.
Trønderen, som no jobbar som fotballekspert for Viaplay og samtidig trenar Lillestrøm sitt G19-lag, kjende det krible i magen då han såg dei gamle lagkameratane sine senke Bodø/Glimt onsdag kveld.
Kanarifuglane vann 1–0 heime på Åråsen og er klare for sin fjortande cupfinale. Dersom dei slår Brann i finalen 20. mai tek dei den sjuande cuptittelen sin og deira første sidan 2017.
For Helland sin del kan det bli det femte cupgullet hans. Det sjølv om han 9. november i fjor annonserte at han er ferdig som fotballspelar.
– Det største du kan oppleve
Turneringsreglane til Noregs Fotballforbund fastslår nemleg at dersom ein spelar har spelt to cupkampar, eller sjølve finalen, er ein som cupvinnar å rekne.
Helland spelte to kampar for Lillestrøm på deira veg mot cupfinalen før han la opp.
Han vart matchvinnar mot Junkeren i andre runde og spelte deretter den første omgangen i etterfølgjande runde mot Aalesund. Dermed er han kvalifisert til å få ein sølvpokal dersom Lillestrøm skulle slå Brann på Ullevaal stadion.
Sånn sett eit «frykteleg fortent» cupgull, seier Helland med glimt i auget.
– Det blir potensielt jævla artig, seier han, og spekulerer på om han set ein eller annan rekord dersom det skulle skje.
Helland vann det første cupgullet sitt i 2012, då med oskeladden Hødd. Året etter drog han til Rosenborg og fekk tre nye cupgull: I 2015, 2016 og 2018.
– Eg unner verkeleg gutane å få oppleve det. Eg har vore privilegert og fått oppleve fem cupfinalar og vore med på å vinne fire av dei. Ein cupfinale er det største du kan oppleve som fotballspelar. Ein enkeltkamp der alt står på spel. Det er berre å gå ut på banen og nyte den augneblinken. Det er alt ein drøymde om som barn, seier Helland.
Kan tangere legende
All si erfaring til trass: Helland avviser eit comeback før cupfinalen. Mannen med det dødelege venstrebeinet gav seg ikkje som fotballproff fordi han ville, men fordi kroppen ikkje lenger spelte på lag.
– Det held ikkje med ein månads trening for å sveive meg i gang på det nivået som trengst og krevst der. Vi stoler heller på dei som er friske og klare, som spelte eller sat på benken mot Brann. Det trur eg er det luraste, seier han med eit smil.
Skulle cuptittel nummer fem komme den 20. mai vil han tangere Rosenborg-legenda Roar Strand i talet på cupgull.
– Det er ei frykteleg sterk gulrot. Ein kan bli kanin av mindre, seier Helland.
Det er Skeid-legenda Jan «Jonas» Gulbrandsen som har flest cupgull i historia. Han vann seks gonger med Skeid på 1950- og 60-talet.
Per i dag står seks spelarar med fem cupgull: Strand, Hans Nordahl (Skeid), Håkon Johannessen (Fredrikstad), Thaulow Goberg (Odd), Einar «Jeja» Gundersen (Odd) og Ingolf «Skruen» Pedersen (Odd).
Helland kan altså bli den åttande spelaren med fem cupgull eller fleire. Eller som han seier sjølv:
– Viss Lillestrøm vinn så får eg det femte cupgullet mitt. Eg trur Vålerenga har fire, så det er litt kult.