– Det er alltid godt å score mål. Spesielt i dag som er dottera mi blir eitt år, det er stort å dedikere eit mål til ho, seier Eidur Gudjohnsen etter å ha brilliert for Molde med mål og målgjevande pasning mot Lillestrøm.
Men før kvelden hadde Gudjohnsen og norsk eliteserie hatt ein liknande start på årets sesong. Begge har sett tunge og kjedelege ut, og har vore langt ifrå å begeistre publikum.
I kveld endra alt seg.
For Molde og Lillestrøm leverte noko det norske fotballpublikummet ikkje har vore bortskjemte med til nå i sesongen. Ein underhaldande fotballkamp.
– Det var verkeleg ein spennande fotballkamp med mykje action i begge ender, kanskje litt for mykje i den eine men gledeleg mykje i den andre, seier Molde-trenar, Ole Gunnar Solskjær med eit smil.
Mykje av fokuset har som kjent vore dårlege baneforhold til nå i sesongen.
Topp fredagsunderhaldning
I kveld bylgja spelet fram og tilbake gjennom heile kampen og sjansane kom på rad og rekke.
Molde gjekk tidleg opp i teten ved Mattias Moström etter fem minutt. Og kven andre enn helten frå Sagaøya med fortid i Chelsea, Barcelona og Tottenham stod bak. Gudjohnsen fann svensken på lekkert vis, før Moström sende Molde i føringa.
– Eg føler eg har kome meir og meir inn i laget og den fysikken forma mi er blitt betre. Men eg føler ikkje at eg er på mitt beste heilt ennå, det er framleis rom for forbetringar, seier Gudjohnsen til NRK.
Trenar Solskjær var iallfall godt fornøgd med det han såg av mannen som blei kåra til banens beste i dag.
– Eidur viser klasse. Han blir berre betre og betre i fysisk form og i dag spring han mykje. Rutinen hans er veldig viktig, seier Solskjær.
Reservekeeperar i fokus
Men Lillestrøm slo fort tilbake etter keepertabbe frå Moldes reservekeeper Andreas Linde. Den utnytta nigerianske Fred Friday og dermed 1–1. Sander Svendsen gjorde alt sjølv og minna om sjefen sjølv da han ordna 2–1 leiing men Molde gav seg ikkje med det før pause.
Sjansane kom på løpande band og begge lag var nok prega av å spele utan fyrstekeeperen i mål. Jacob Faye Lund hadde ikkje stått i mål for Lillestrøm på tre år og måtte sjå Harmeet Singh fyre laus frå langt hald utan sjanse til å stå i vegen for mål.
Dermed stod det 3–1 til Molde på heimebane til pause.
Erling Knudtzon sytte for stor spenning med ei nydeleg heading etter 56 minutt, men så var det denne islendingen da.
Eidur Gudjohnsen fekk sjansen frå straffemerket og sette inn straffa på best mogleg vis rett opp i vinkelen.
Dermed enda det 4–2 i Molde i ein svært sjåverdig fotballkamp.
