- SLIK VAR KAMPEN: Athletic Club de Bilbao - Manchester United 1-2 (5-3 samanlagt)
– Vårt mål er å komme på det samme nivået som Barcelona, sa Manchester United-manager Alex Ferguson før denne sesongen.
Held skotten enno på desse måla, bør han raskt gløyme at laget hans torsdag kveld rauk ut av europaligaen mot Spanias sjuande beste lag, Athletic Club de Bilbao.
Det skjedde bare tre månader etter at Manchester United rauk på trynet ut av meisterligaen, etter tap mot sveitsiske Basel.
Herja framfor elleville fans
Eit fullsett og kokande San Mamés Stadion fekk sjå heimelaget herje med serieleiaren frå England i europaligaens åttedelsfinale.
Spanjolane frå Bilbao vann 3-2 på Old Trafford førre veke, og hadde eit glimrande utgangspunkt med tanke på avansement.
Stemninga hos dei drygt 30 000 tilskodarane eksploderte då Fernando Llorente sende heimelaget i leiinga etter 23 minutt. Med nettkjenninga måtte Manchester United score tre mål for å kunne ta seg vidare til kvartfinale.
Håpet forsvann då Oscar De Marcos la på til 2-0 i andre omgang.
Wayne Rooney pynta på samanlagtresultatet med ei perle av ein avslutning då ti minutt stod igjen av kampen, men det blei bare med den eine nettkjenninga.
– Vi kan ikkje klage. I første omgang slapp vi inn eit veldig billig mål, som var det aller verste som kunne skje. Det er utruleg at vi slapp inn eit mål som det, sa Ferguson til Channel Five.
Les vidare under biletet...
Scheie: – Aldri bra å tape kampar
Med 2-1-triumf i åttedelsfinalens siste kamp, kan Athletic Club ta med seg ein god porsjon sjølvtillit til kvartfinalen.
For sjølv om europaligaen nok ikkje er særleg prestisjetungt for Alex Ferguson, er tapssifra dårlege for eit suksesslag som United.
Athletic Club vann 5-3 samanlagt.
– Dette meir skuffande enn noko anna. Vi spelte ikkje på vårt beste i meisterligaen, og no er vi ute av europaligaen, konstaterte Ferguson.
NRKs Arne Scheie fekk ikkje sett kampen, men er klar på at exiten var pinleg for United.
– United skulle uansett på dette nivået ha slått Bilbao komfortabelt før dei reiste til Spania, seier fotballkommentatoren.
– No har dei ein mindre turnering å tenke på. Er europaliga-exiten bra for United med tanke på kampen om seriegullet?
– For å seie det slik: Det er uansett aldri bra å tape fotballkampar, seier Scheie.
Her er Fergusons spanskesjuke
Ferguson har tydeleg ein kode å knekke når det gjeld kampar på spansk jord. Middelhavslandet er på ingen måte skottens territorium.
Etter nederlaget mot Athletic Club står laget med eitt tap, tre uavgjort og bare ein triumf borte i Spania dei siste fem kampane.
Dei dryge 450 minuttene med fotball mot lag frå Primera Division har også bare resultert i to scoringar.
Her er kampane:
- Athletic Club de Bilbao - Manchester United 2-1 (15. mars 2012)
- Valencia - Manchester United 0-1 (29. september 2010)
- Villareal - Mancester United 0-0 (25. november 2008)
- Barcelona - Manchester United 0-0 (23. april 2008)
- Villareal - Manchester United 0-0 (14. september 2005)
No er håpet om Premier League-gull det einaste Manchester United har igjen denne sesongen. I ligaen ligg dei på topp, bare eitt poeng framfor Manchester City når ti kampar gjenstår.